So'rovnomada besh nafar darvozabon ishtirok etdi. Bular - Xaled Eysa ("Al Ayn"), Muhammad Rashid Mazaheri ("Zobahan"), Ignatiy Nesterov ("Lokomotiv"), Shusaku Nishikava ("Urava Reds") hamda Vedran Yanyetovich ("Sidney" FK).

Mazkur so'rovnomada tajribali posbon Ignatiy Nesterov uchinchi o'rinni egalladi. So'rovda ishtirok etgan 42,446 muxlisdan 64 foizi eronlik darvozabonga ovoz bergan. Natijada Muhammad Rashid Mazaheri hech qanday raqobatsiz birinchi bo'ldi.

BAA terma jamoasi darvozaboni Xaled Eysa 27 foiz ovoz yig'ib ikkinchi o'rinni egalladi. Ignatiy Nesterov esa 5 foiz ovoz bilan uchinchi bo'ldi. Shusaku Nishikava 3 foiz to'plab to'rtinchi o'rinni egallagan bo'lsa, avstraliyalik darvozabon Vedran Yanyetovich 1 foiz ovoz bilan oxirgi o'rinda qoldi.

Endi darvozabonlarning 2016 yilgi OCHL ko'rsatkichlarini keltirib o'tsak:

Xalid Eysa ("Al Ayn") - 14 uchrashuv, -13 gol, 5ta quruq seriya

Muhammad Rashid Mazaheri ("Zobahan") - 8 o'yin, -5 gol, 5ta quruq seriya.

Ignatiy Nesterov ("Lokomotiv") - 10 o'yin, -5 gol, 5ta quruq seriya.

Shusaku Nishikava ("Urava Reds") - 8 o'yin, -7 gol, 4ta quruq seriya.

Vedran Yanyetovich ("Sidney" FK) - 8 o'yin, -7gol, 3ta quruq seriya.

Malumki, 2016 yil "Loko" uchun Osiyo chempionlar ligasidagi eng omadli mavsum hisoblanadi. "Temiryo'lchilar" shu yili chorak finalga qadar borib, Ignatiy Nesterov eng yaxshi o'yinchilardan biri bo'lgandi.

Aytish mumkinki, o'sha yil "Lokomotiv" Eron klubi "Zobahan"ga nisbatan birmuncha yaxshi ishtirok etgan. Lekin eronlik darvozabonning birinchi o'rinni olishi kutilmagan holat emas.

Gap shundaki, OFK o'tkazadigan so'rovnomalarda eronlik muxlislar juda faol ishtirok etishadi. Agar so'rovda "Zobahan" darvozaboni emas, balki "Loko" bilan bir guruhda kurashib guruhdan chiqa olmagan "Sepaxon" darvozaboni bo'lganida ham baribir birni olardi.

Chunki OFK so'rovnomalarida ovoz berish bo'yicha Vetnam va Eron oldiga tushadigani yo'q. O'zbekistonlik muxlislar uchun esa baribir Ignatiy Nesterov birinchi raqamli bo'lib qolaveradi.

OFK so'rovnomasi tugadi. Nesterov uchinchi bo'ldi