ОФК веб-сайти тугалланаётган йилни таҳлил қилиб барча ойларга тўхталган ҳолда йилнинг энг муҳим воқеалари ҳақида мақола чоп этди. Биз ҳам ОФКга аъзо давлат бўлганимиз учун ташкилот билан боғлиқ ҳеч бир воқеага бефарқ эмасмиз. Шу боис қуйида йилнинг энг муҳим воқеаларини келтириб ўтамиз.

ЯНВАРЬ

2017 йилнинг январи Осиё чемпионлар лигаси ҳамда ОФК Кубогига бўлган ўтиш ўйинлари билан ёдда қоладиган бўлди. Филиппиннинг "Глобал" футбол клуби ўз тарихида илк бор ОЧЛ ўтиш баҳсларида иштирок этди. Бу жамоа Сингапурнинг "Тампинес Роверс" клубига қарши баҳс олиб борди.

ФЕВРАЛЬ

Февраль ойига келиб ОЧЛ гуруҳ ўйинларига старт берилди. Гонконг чемпиони "Истерн" клуби ўз тарихида илк бор гуруҳ босқичида иштирок этди. Бундан ташқари, ОЧЛ тарихида илк бор аёл киши Чан Юэн Тинг эркаклар жамоасига мураббийлик қилди. 28 ёшли мураббий гарчи жамоасини гуруҳдан олиб чиқа олмаган бўлса-да, "Гуангжу Эвергранд"га қарши баҳс кўпчиликнинг ёдида қолди. Февралда шунингдек, ОФК Кубоги гуруҳ баҳсларига ҳам старт берилди.

МАРТ

Март ойида Малайзияда пляж футболи бўйича Осиё чемпионати бўлиб ўтди. Бунда 13та жамоа баҳс олиб борди. Финалда БААни 7:2 ҳисобида мағлуб Эрон терма жамоаси ғолибликни қўлга киритди. Учинчи ўрин эса Японияга насиб этди. Бу ойда ЖЧ-2018 саралаш босқичида Хитой ўзининг илк ғалабасига эришди. Марчелло Липпи шогирдлари уйда Жанубий Кореядан 1:0 ҳисобида устун келишди. Қолаверса, 24 жамоа ўртасида Осиё Кубоги-2019 мусобақаси учун саралаш баҳслари старт олди.

АПРЕЛЬ

7 апрель куни ўтказилган Жанубий Корея ва КХДР аёллар термаси ўртасидаги баҳсни кўриш учун стадионга 42,500 нафар мухлис ташриф буюрди. Бу аёллар футболи бўйича Осиё чемпионатига саралаш баҳси эди. Ўйин 1:1 ҳисобида якунига етди. Қолаверса, бу ойда ОЧЛ ва ОФК Кубоги гуруҳ босқичи беллашувлари давом эттирилди.

МАЙ

Банкокда футзал бўйича U-20 Осиё чемпионати бўлиб ўтди. Бунда барча ўйинларда ғалаба қозонган Эрон ғолибликни қўлга киритди. Форслар мусобақада 27та гол уришга эришишди. Ҳамюртимиз Акбар Усмонов 13та гол билан мусобақанинг "Энг яхши тўпурари" совринига сазовор бўлди. ОЧЛда 1/8 финал ўйинлари ўтказилди.

ИЮНЬ

Эрон миллий терма жамоаси муддатидан аввал Жаҳон чемпионати йўлланмасига эга чиқди. Ўзбекистонга қарши баҳсда 2:0 ҳисобида ғалаба қозонган Эрон мундиал чиптасини қўлга киритди. Эронга бу ўйинда Сардор Азмун билан Меҳди Тареми томонидан киритилган голлар ғалабани тақдим этди.

ИЮЛЬ

Вьетнамнинг Хошимин шаҳрида футзал бўйича клублар ўртасидаги Осиё чемпионати ташкил этилди. Бунда 14та жамоа иштирок этди. Таиланднинг "Чонбури" футзал клуби ғолибликни қўлга киритди. Ўзбекистон номидан иштирок этган "Олмалиқ" футзал клуби эса ўзини кўрсата олмади.

АВГУСТ

Уч ойлик танаффусдан сўнг Осиё чемпионлар лигаси яна давом эттирилди. Хитойнинг "Шанхай СИПГ" клуби бу ойда "Гуангжу Эвергранд"ни 4:0 ҳисобида мағлуб этган бўлса, "Урава Редс" чорак финалда "Кавасаки Фронтале"ни мусобақадан чиқариб юборди. Ғарб минтақасида "Ал Ҳилол" - "Ал Айн", "Ал Аҳли" - "Персеполис" баҳслари ўтказилди. Шунингдек, ўз майдонида Австралияни 2:0 ҳисобида мағлуб этган Япония жаҳон чемпионати йўлланмасига эга бўлди.

СЕНТЯБРЬ

Сафарда Ўзбекистон билан 0:0 ўйнаган Жанубий Корея ЖЧ-2018 йўлланмасига эга бўлди. Шунингдек, Саудия Арабистони ҳам бу ойда тўғридан-тўғри мундиал чиптасини қўлга киритди. Аёллар футболи бўйича ўтказилган U-16 Осиё чемпионатида КХДР ғолиб чиқди. ОЧЛда "Ал Ҳилол" ва "Ал Аҳли" клублари ярим финалга йўл олишди. Шарқ минтақасидан "Шанхай СИПГ" билан "Урава Редс" кейинги босқичга чиқди.

ОКТЯБРЬ

Сурия ва Австралия ўртасида ЖЧ-2018 саралаш босқичига плей-офф ўйинлари ўтказилди ва бунда Австралиянинг қўли баланд келди. ОЧЛда эcа финалчилар аниқланди. "Ал Ҳилол" ва "Урава Редс" клублар ўртасидаги энг нуфузли мусобақа финалида ўйнайдиган бўлишди. Аёллар футболи бўйича ўтказилган U-19 Осиё чемпионатида Япония қизлари ғолиб бўлишди.

НОЯБРЬ

Австралия икки ўйин натижасига кўра Гондурасни 3:1 ҳисобида мағлуб этиб, Жаҳон чемпионати йўлланмасини қўлга киритди. Шундай қилиб тарихда илк марта мундиалда ОФКдан бешта терма жамоа иштирок этадиган бўлди. ОЧЛ ғолиблиги эса Япониянинг "Урава Редс" клубига насиб этди. ОФК Кубогида Ироқнинг "Эйр Форс" клубига тенг келадигани топилмади. Ноябрда шунингдек, ОФК йилнинг энг яхшиларини тақдирлаш маросимини ўтказди.

ДЕКАБРЬ

БААда клублар ўртасидаги жаҳон чемпионати баҳслари ўтказилди. "Ал Жазира" ўз иштироки билан кўпчиликни ҳайрон қолдирди. Улар "Оклэнд Сити" ва "Урава Редс"ни мағлуб этишнинг уддасидан чиқа олишди. Бироқ "Реал" билан кечган ўйинда БАА клуби мағлуб бўлди. Шунингдек, учинчи ўрин учун кечган баҳсда ҳам "Ал Жазира"дан омад юз ўгирди.

ОФКдан йилнинг энг муҳим воқеалари