Superliganing 8-turidan o'rin olgan OKMK – "Andijon" uchrashuvining 60-daqiqasida OKMK futbolchisi to'psiz vaziyatda raqib jamoa vakilining yuziga tirsak bilan zarba berdi. Bosh hakam Rustam Lutfullin ushbu holatda VAR hakami bilan maslahatlashgan holda to'g'ri qaror chiqardi va tegishli chorani ko'rdi.

Biroq bellashuvning 85-daqiqasida bahsli penalti holati yuzaga keldi. Futbolchilar o'rtasida to'p uchun kurash davomida bosh hakam penalti belgiladi. Ammo vaziyatni tahlil qilgan ekspert hakamlar qaroriga ko'ra, ushbu holatda 11 metrlik jarima zarbasi tayinlanmasligi kerak edi.

Hakamlar qo'mitasi qaroriga ko'ra, Rustam Lutfullin xatolikka yo'l qo'ygani uchun nomuayyan muddatga chetlashtirildi.

Shuningdek, "Qizilqum" – "Navbahor" o'yinining 90+5-daqiqasida bosh hakam Ahrol Risqullaev "Navbahor" futbolchisining qo'liga tekkan to'p sababli penalti belgiladi. VAR orqali vaziyat tekshirilgach, qaror o'zgarishsiz qolgan va 90+12-daqiqada ushbu penalti amalga oshirilgan. Ammo ekspertlar ushbu holatda futbolchining qo'li tanasiga yopishib turgani bois penalti tayinlanmasligi kerak deb topdi.

Hakamlar qo'mitasi qaroriga ko'ra, Ahrol Risqullaev ham o'yinda yo'l qo'ygan xatosi tufayli nomuayyan muddatga chetlashtirildi.

OKMK – "Andijon" va "Qizilqum" – "Navbahor" bahslarida ishlagan hakamlar nomuayyan muddatga chetlashtirildi