Ўйин тақдирини яна ўша футболчи ҳал қилди. Дастлабки таассуротларнинг "айтишича", Драган қаторасига 4-марта Суперлига "снайпери"га айланиб, ўз рекордни яхшилаб қўйиш учун асосий даъвогар бўлади.

Самарқандда ҳисобни очган ҳам, Суперкубокни "Пахтакор"га олиб берган ҳам у эди. Эътибор берилса, Сергеев ва Машарипов кетганидан кейин "шерлар"нинг ўйини тамоман Черанга боғланиб қолди. Гап ҳужумларни бошлаш ёки ўйин қуриш ҳақидагина эмас. Натижага бевосита таъсир қиладиган зарбалар ҳам айнан Драганга тегишли бўлиб қоляпти. Агар сербиялик футболчи 2021 йилги мавсумда "Пахтакор"га олиб берган очколар (17) ҳисобдан чиқарилса, "шерлар" мусобақа жадвалининг 6-поғонасига тушиб кетар эди.

Охирги 1 йилга эътибор қаратсак, Драган Суперлигада 8 (+ 2та Суперкубок) ўйин тақдирини ёлғиз ўзи ҳал қилгани кўриняпти. "Пахтакор" тўлиқ қуролсизлантирилишига қарамай, рақиб жамоа ҳар гал Черан қаршисида ожиз қолаверган. Худди ўлимга чора топилмаганидек, Драганни тўхтатиш ҳам имконсиз эди ўша ўйинларда...

Футболимиз тарихидаги энг яхши легионерлар ҳақида сўралса, кўплар Ривалдо, Холматов ёки Геворкянни айтади. Аслида бунга жавобан бемалол Драган Черанни кўрсатса бўлади.

ФАКТ:
- Сербиялик футболчи сўнгги 3 йилда Термизнинг "Сурхон" клубига нисбатан кўпроқ тўп киритган (62>61).
- У 2020 йилги мавсумда "Бухоро", "Андижон", "Сурхон" ва "Қизилқум" жамоаларининг тўлиқ таркибидан кўпроқ гол урган эди.
- Драган қаторасига 3 марта Ўзбекистон чемпионати "бомбардир"ига айланган тарихдаги ягона футболчи!

Биласизми, бу дунёда ўлим ва Драган Черандан қочиш мутлақ имконсиз. Чунки у қаршисига чиққан ҳаммани жазолайди. Футболчи Суперлиганинг барча жамоалари (19) дарвозасига йўл топа олган (Черан тепган тўплардан энг кўп азият чеккан клуб — "Бухоро", 12 марта).

3-турдаги "Олимпик" эса Драган учун 20-рақиб ҳисобланади. Қизиқарли томони, агар Черан 16 март куни Владимир Назаров дарвозасини ишғол қилса, бу сербиялик футболчи учун Ўзбекистон чемпионатларидаги юбилей 100-голга айланади.

"Ёлғиз посбон". "Навбаҳор" етакчисининг сиз билмаган ҳикояси

Ўлимга ўхшайди...