Tarkibdagi o'zgarishlar

"Olimpik" tarkibidagi asosiy o'zgarishlar himoya chizig'ida ro'y berdi. Mavsumlar oralig'ida jamoani besh himoyachi tark etdi. Ular orasida Doston Tursunov, Javohir Jo'raev, Sunnatulloh Hamidjonov, Muhammadqodir Hamraliev va Jaloliddin Sodiqov bor. Ularning o'rniga Odil Abdumajidov (ijara), Iskandar Bo'sinov va Ahmadullo Muqimjonov kelishdi.

Shuningdek, "Bunyodkor"ga yo'l olgan, ammo Boshkovichning istefosidan so'ng Farg'onaning "Neftchi" klubi bilan shartnoma imzolagan darvozabon Vladimir Nazarovning ham ketishini qayd etish kerak.

Jamoa hujum chizig'ini ham kuchaytirdi. Olimpiya terma jamoasi etakchilaridan biri Jasur Jaloliddinov yangi mavsum Timur Kapadze qo'l ostida o'ynaydi – u "Lokomotiv"dan ijara asosida o'tdi. Klub undan tashqari hujumchilar Rustam Azimov va Azamat Abdurashidov bilan shartnoma imzoladi.

Yig'indagi natijalar

Timur Kapadze ikki tarkib uchun Turkiyada qishki yig'inlarni o'tkazdi: "Olimpik" va 23 yoshgacha bo'lgan O'zbekiston terma jamoasi. "Olimpik" o'yinchilarining bir qismi olimpiya terma jamoasi yig'inida ham ishtirok etishdi. "Olimpik"ning nazorat bahslariga kelsa, ular sakkizta o'yin o'tkazishdi, ulardan faqatgina ikkitasida g'alabaga erishildi.

"Olimpik" - "Sherif" (Moldova) - 1:2
"Olimpik" - "Veles Mostar" (Bosniya va Gercegovina) - 2:1
"Olimpik" - Iordaniya U-20 - 0:2
"Olimpik" - "Otetul Galac" (Ruminiya) - 1:1
"Olimpik" - "Arsenal Tula" (Rossiya) - 2:4
"Olimpik" - "Dinamo" (Rossiya) 0:1
"Olimpik" - "Valmiera" (Latviya) - 2:3
"Olimpik" - "Alay" (Qirg'izston) - 4:0

Rahbariyat va murabbiylar shtabidagi o'zgarishlar

Server Jeparov klubga bosh murabbiy yordamchisi sifatida qo'shildi. Shuningdek, klubdan o'tgan mavsum U-19 jamoasida faoliyat yuritgan murabbiy Akmal Xolmatovning ketganini ham qayd etish kerak. U yangi mavsum "Buxoro" murabbiylar shtabida ish boshlaydi.

Qo'shimcha malumot

Ruslan Jiyanov mavsumlar oralig'ida Rossiyaning "Pari NN" klubi bilan shartnoma imzoladi, ammo klublarning kelishuviga ko'ra, u mavsum so'nggiga qadar "Olimpik"da harakat qiladi.

"Olimpik" ligadagi eng yosh tarkibga ega. O'yinchilarning o'rtacha yoshi – 20,7 yosh.

Timur Kapadze 2022 yil O'zbekistonning eng yaxshi murabbiyiga aylandi. U "Olimpik" bosh murabbiyi sifatida Superligadagi debyut mavsumdayoq jamoaning oltinchi o'rinni egallashini taminladi.

Emil Bekmuhammedov tayyorladi

Alisher Ostonov tarjimasi

"Olimpik" qishki "pauza"da qanday o'zgardi?