Dastlab 11-turdagi natijalarni yodga olsak.

17 may (chorshanba)
"Bunyodkor" - "Paxtakor" 1:1
"Qo'qon-1912" - "Lokomotiv" 1:1

18 may (payshanba)
“Nasaf” – “Mashal” 1:0
“Olmaliq” – “Metallurg” 1:0
“So'g'diyona” – “Sho'rtan” 1:0
“Buxoro” – “Navbahor” 3:3
“Obod” – “Dinamo” 3:1
“Qizilqum” – “Neftchi” 2:2

Turning muhim voqealari:
- Bu turda darvozalarga jami 21ta to'p kiritildi: 13ta mezbonlar, 8ta mehmonlar. Uchta uchrashuvda mehmonlar gol ura olishmadi. Bular - "Mashal", "Metallurg" va "Sho'rtan".
- Gollarga boy o'yin Buxoroda bo'lib o'tdi. "Buxoro" - "Navbahor" bahsi 3:3 hisobida yakun topdi. O'yinda "Navbahor" darvozasi tomon uchta penalti belgilandi. Shundan ikkitasini Ivan Nagaev aniq amalga oshirgan bo'lsa, Alisher Shog'ulomovning zarbasini mehmonlar posboni Asilbek Omonov qaytarib qoldi.
- "Buxoro" - "Navbahor" bahsida bosh hakam Temur To'xtasinovning ishi nazoratchi Oleg Dachev tomonidan 7,2 ballga loyiq ko'rildi. Bu eng past baho.
- Bu turda jami 45 futbolchiga sariq kartochka ko'rsatildi. Shuningdek, to'rt nafar o'yinchi maydondan chetlatildi. Bular - Iskandar Shayqulov ("Mashal"), Ergash Ismoilov ("Buxoro"), Oybek Qilichev ("Navbahor") va Muzaffar Muzaffarov ("Neftchi").
- Eng ko'p sariq kartochka "Buxoro" - "Navbahor" va "Qizilqum" - "Neftchi" bahsida kuzatildi. Har bir o'yinda sakkiztadan.
- PFL qaydnomasiga ko'ra eng ko'p tomoshabin "Buxoro" stadioniga tashrif buyurdi - 10954 nafar. Eng kam muxlis esa "Obod" - "Dinamo" bahsiga keldi - 1260.

11-turda gol urgan futbolchilar:
"Bunyodkor" - Doston Hamdamov
"Paxtakor" - Stanislav Andreev
"Qo'qon-1912" - Darko Gojkovich
"Lokomotiv" - Marat Bikmaev
"Nasaf" - Islom Rashidxonov
"Olmaliq" - Igor Yelich
"So'g'diyona" - Sanjar Rashidov
"Buxoro" - Kirill Pasichnik, Ivan Nagaev (2ta penalti)
"Navbahor" - Aziz Turg'unboev, Nemanya Yovanovich (2ta)
"Obod" - Sanjar Rixsibaev(2ta), Doniyor Hasanov
"Dinamo" - Abdumalik Abdullaev
"Qizilqum" - Fayzulla Qambarov, Otabek Zokirov
"Neftchi" - Muzaffar Muzaffarov, Dmitriy Komarovskiy.
"Mashal" - hech kim
"Metallurg" - hech kim
"Sho'rtan" - hech kim

Muxlislar tashrifi (O'yin qaydnomasiga ko'ra):
1. "Buxoro" - 10954
2. "Qo'qon-1912" - 10576
3. "Qizilqum" - 6472
4. "Olmaliq" - 2485
5. "Bunyodkor" - 2123
6. "So'g'diyona" - 2067
7. "Nasaf" - 1503
8. "Obod" - 1260

Qiziqarli malumotlar:
- "Bunyodkor" ketma-ket besh o'yinda g'alaba qozona olmadi: uch durang va ikki mag'lubiyat. Qolaversa, bu jamoa oliy ligada eng kam to'p kiritgan - 7ta.
- "Paxtakor" safarda ikkinchi golini urdi va uchinchi marta durang o'ynadi. "Paxtakor" mavsum boshidan beri safarda hali g'alaba qozonmay kelmoqda.
- "Qo'qon-1912" ketma-ket uchinchi o'yinda durangga erishdi. Bu jamoa safarda "Sho'rtan"ni mag'lub etganidan beri boshqa yuta olmayapti. Qizig'i shundaki, "Qo'qon-1912"ning oxirgi uchta o'yini bir xil 1:1 hisobida yakun topdi.
- Marat Bikmaev "Loko" safida yana gol urdi. Uning oliy ligadagi gollari soni 11taga etdi. Ammo bu turda "temiryo'lchilar" g'alaba qozona olishmadi.
- "Nasaf" uydagi beshinchi o'yinni ham g'alaba bilan yakunladi. "Nasaf"dan tashqari "Loko" ham uydagi bellashuvlarda uch ochkoni qo'lga kiritib kelmoqda.
- "Mashal" safarda yana mag'lub bo'ldi. Jamoa o'z maydonida "Bunyodkor"ni mag'lub etganidan beri ketma-ket uch o'yindan buyon gol ura olmayapti.
- Uyda g'alabaga erishgan "Olmaliq"ning mag'lubiyatsiz seriyasi ettita o'yinga etdi. Qolaversa, jamoa uydagi uchrashuvlarda gol o'tkazmasdan g'alaba qozonish ananasini davom ettirdi. "Olmaliq" - "Metallurg" 1:0.

- "Metallurg" safarda yana imkoniyatni boy berdi. Toshkentda "Bunyodkor" bilan durang o'ynagan jamoa Olmaliqda hech bo'lmasa shuni uddalay olmadi.
- "So'g'diyona" uydagi oxirgi ikki o'yinni gol o'tkazmasdan g'alaba bilan yakunladi. Jizzaxliklar avvaliga "Mashal", keyin "Sho'rtan"ni mag'lub etishdi.
- "Sho'rtan" safardagi beshinchi o'yinida beshinchi mag'lubiyatini qabul qilib oldi. Jamoa uyda sher, lekin chetga chiqqanda hatto durang qila olmayapti.
- "Buxoro" o'z maydonida ikkinchi bor durangga erishdi. Agar o'yin oxirlarida Alisher Shog'ulomov penaltidan gol urganida maydon egalari g'alaba qozonishlari mumkin edi.

- "Navbahor" qatorasiga uchinchi o'yinni ham durang bilan yakunladi - 2:2, 1:1 va 3:3. Keyingi o'yinda 4:4 ko'ramizmi?
- Nihoyat, bu turda "Obod" uydagi ilk g'alabasini nishonladi. O'tgan yilgi "o'zbek "Lesteri" bu yil "Lester" bo'lishi kutilgan "Dinamo"ni 3:1 hisobida mag'lub etdi.
- "Dinamo"ga kelsak, bu jamoa ham "Bunyodkor"ga o'xshab oxirgi beshta uchrashuvni yuta olmadi. Uch durang, ikki mag'lubiyat. Kechagi mag'lubiyat esa "Dinamo"ga rosa alam qildi.
- "Qizilqum" oxirgi oltita bahsning to'rttasini g'alaba bilan yakunladi. Jamoa kecha sal bo'shashganida o'z maydonida yutqazib qo'yishi ham mumkin edi.
- "Neftchi" safardagi ikkinchi g'alabasini nishonlashga yaqin turgandi. Biroq jamoa 2:0 hisobida oldinda borayotib, 2:2 o'ynadi. Umuman olganda, "Neftchi" bu yil hisobidan faqat ikkita bahsda g'alaba qozongan.

Oliy ligada 11-tur yakunlari