Eron milliy terma jamoasi 2 sentyabr kuni "Ozodi" stadionida Suriyani qabul qiladi. Eron terma jamoasining saralash o'yinlarisiz uchinchi bosqichni boshlashi mahalliy matbuotni xavotirga solyapti. Masalan, guruhdagi raqib BAA terma jamoasi 6 avgustdan Serbiyada o'quv-mashg'ulotlarni boshladi va 13 avgustga qadar o'rtoqlik uchrashuvi ham o'tkazadi.

Iroq terma jamoasi ham yangi murabbiy Dik Advokat qo'l ostida Serbiyada yig'in o'tkazadi va yig'in davomida Ummon va Xorvatiyaga qarshi o'rtoqlik uchrashuvlarida maydonga tushadi.

Milliy chempionat o'yinlari qoldirilgani bois Livan termasi bir oy oldin yig'ildi va hozirda tayyorgarlikni davom ettiryapti. Bu jamoa shu oyda ikkita yig'in o'tkazishni rejalashtirib qo'ygan: Turkiya va BAAda. Livanliklar 2 sentyabr kuni Dubayda BAA bilan o'ynashadi.

Eron terma jamoasi 25 avgustdan yig'iladi. Dragan Skochich shogirdlari faqat mashg'ulot o'tkazish bilan cheklanishadi. Hech qanday o'rtoqlik uchrashuvisiz uchinchi raundni boshlash qimmatga tushmasa bo'ldi deb bong urmoqda mahalliy matbuot.

O'rtoqlik uchrashuvisiz JCH saralash bahslarini boshlash Eronni tashvishga solyapti