Eng tor ko'chalarga kirishdan oldin ham avval xaritaga qaraladi. Ammo biz haqida so'z borayotgan yo'l, dunyo xaritasida belgilanmagan, globusda nomalanmagan manzil edi. Bu - futbolda musobaqalar gultoji sanalmish Jahon chempionatiga olib boruvchi yo'l edi.

Bu yo'lni biz 34 yil izladik. Shu maqsadda necha marta karvonni manzilga qarata burdik. Bir necha bor endi etib qolgandek bo'ldik, biroq har gal qandaydir sabab bilan karvon yana ortga qaytdi. Turli murabbiylarni taklif etdik, ular o'z bilim va tajribalari bilan yo'l ochishga urinishdi. Ammo hech biri bu mashaqqatli yo'lni oxirigacha etib bora olmadi. Nihoyasida esa biz Jahon chempionati sari olib boruvchi, ammo hech qaysi xaritada belgilanmagan manzilga Srechko Katanec va Timur Kapadze boshchiligida etib bordik. Kapadze – shunchaki murabbiy emas, u har qanday sharoitda natija uchun ishlashni, mavjud vaziyatdan maksimal foyda keltirishni maqsad qilgan, masuliyatni zimmasiga olishdan chekinmagan mutaxassisdir. U ishlagan har bir klub yoki terma jamoada maqsad aniq, yo'nalish ravshan bo'lgan.

Shaxsan men Kapadzeni murabbiylik faoliyatining ilk yillaridanoq kuzatib kelaman. Shu bois, u haqidagi fikrlarimni aniq faktlar va shaxsiy kuzatuvlar asosida bayon etishni lozim topdim.

2019 yil. “Lokomotiv” yoshlari bilan chempionlik poydevori va “Qo'qon-1912”ni qutqarish missiyasi

2019 yil Timur Kapadze murabbiylik faoliyatida muhim qadamlar tashlangan yil bo'ldi. U “Lokomotiv” jamoasining o'rinbosarlarini qabul qilib oldi va debyut mavsumidayoq yoshlardan iborat jamoa bilan jiddiy natija qayd etdi. Shu paytgacha yosh “temiryo'lchilar” hech qachon turnir jadvalida peshqadamlik qilmagan edi. O'sha mavsum yakunida jamoani Rifat Akramxo'jaev boshqargan bo'lsa-da, asosiy poydevorni aynan Kapadze qo'yib bergani inkor etilmaydi.

Mavsum o'rtasiga kelib, yana bir sinov - “Qo'qon-1912” klubi bilan bog'liq murakkab missiya paydo bo'ldi. Superligada jon saqlash uchun kurash olib borayotgan “shunqorlar” jiddiy "krizisga" uchragan, jamoa turnir jadvalining eng quyi pog'onasida qolib ketgan edi. Ikkinchi davra boshida Kapadze “Qo'qon-1912”ga yo'l oldi. Garchi u rasman bosh murabbiy sifatida emas, balki norasmiy maqomda faoliyat yuritgan bo'lsa-da, bosh murabbiy Aziz To'xtaboev bilan hamjihatlikda jamoaning o'yinini to'g'ri yo'lga solishga muvaffaq bo'ldi.

Natija qay tarzda o'zgargani raqamlarda aniq ko'rinadi:

Birinchi davrada jamoa 13 ta o'yinda atigi 1 ta g'alaba, 5 ta durang va 7 ta mag'lubiyat qayd etgan holda 8 ochko bilan oxirgi o'rinda borayotgan edi.

Ikkinchi davrada esa “Qo'qon-1912” 13 ta bahsda 5 ta g'alaba, 3 ta durang va 5 ta mag'lubiyat bilan 18 ochko to'plab, 11-o'ringa ko'tarildi va Superligada qolishga erishdi.

Shunday qilib, 2019 yil Timur Kapadze uchun murabbiylikdagi ilk jiddiy sinovlardan biri bo'ldi va u bu sinovni ikki frontda ham muvaffaqiyat bilan engib o'tdi. Yoshlar bilan natija, kattalar bilan esa amalda qutqaruv missiyasini bajarish - bu yil Kapadze murabbiylik salohiyatining ilk jiddiy yoritilishi bo'lib tarixda qoldi.

2020 yil. “Lokomotiv”da takrorlangan scenariy yoxud Kapadze yana “qutqaruvchi” rolida

Yuqori o'rinlar va chempionlik unvoni uchun kurashib kelayotgan “Lokomotiv” 2020 yilda kutilmagan inqirozga duch keldi. Jamoa o'sha mavsumda barqarorlikni yo'qotdi, futbolchilarning kayfiyatida va o'yinida tushkunlik sezilardi. Ayniqsa, “Paxtakor”dan 0:7 va “Nasaf”dan 0:4 hisobidagi mag'lubiyatlar jamoa ishtiyoqini tag tomiri bilan qirqib tashladi. Aynan shu paytda klub muammoni hal etish uchun bugunga qadar o'zini “qutqaruvchi” sifatida namoyon etgan Timur Kapadzega yuzlandi. U qisqa fursat ichida jamoani kayta ruhlantirdi, o'yinda taraqqiyot ko'zga tashlandi, natijalar ham o'zgardi.

Faktlar guvoh:

– Birinchi davrada: 13 o'yin, 4 g'alaba, 9 mag'lubiyat, to'plar nisbati 13–28, jami 12 ochko.

– Ikkinchi davrada: 13 o'yin, 6 g'alaba, 5 durang, faqat 2 mag'lubiyat, to'plar nisbati 15–10, jami 23 ochko.

Ikkinchi davra natijalariga ko'ra “Lokomotiv” “Paxtakor” va “Nasaf”dan keyin uchinchi o'rinni egalladi. Bunday o'zgarish ortida yana Kapadzening ishongan murabbiy sifatidagi tasiri turgani shubhasiz.

2021 yil. “Olimpik” bilan Superliga sari – yoshlarning zafarli qadami

Odatda “Olimpik” kabi jamoalar nega kerak, degan savollar tez-tez yuzaga chiqadi. Ammo Kapadze matbuot anjumanlaridan birida bu savolga javobni qisqa va lo'nda qilib berdi: “Agar klublarda hamma sharoit bo'lganida, “Olimpik” kerak emas edi.”

Darhaqiqat, Kapadze asosiy tarkibda o'ynay olmayotgan futbolchilarni jamlab, yaxlit jamoa tuzdi va ularni raqobatbardosh kuchga aylantirdi.

Pro-ligada “Olimpik” “Neftchi”, “Dinamo”, “Buxoro”, “Sho'rtan” kabi tajribali jamoalarni mag'lub etdi. Utish o'yinida esa “Mashal” ustidan g'alaba qozonib, Superliga yo'llanmasiga sazovor bo'ldi.

Etiborli fakt: “Olimpik”ning o'rtacha yoshi – 20,1. Qiyoslash uchun aytaylik, “Neftchi”da bu ko'rsatkich – 27,8, “Dinamo”da – 25,8, “Mashal”da – 26,5. Bu natijalar Kapadzening murabbiy sifatida yoshlar bilan qanday ishlay olishini yaqqol namoyon qiladi.

2022 yil. Osiyo kubogidagi alamli ko'z yoshlar – umid bilan sug'orilgan final

O'zbekiston U-23 terma jamoasi 2022 yilda tarixda ilk bor bu yoshdagi qita turnirga mezbonlik qildi. Timur Kapadze qo'l ostidagi jamoa asosan 2001 yilda tug'ilgan futbolchilardan tashkil topgan bo'lib, ular uchun bu musobaqa debyut sanalgan.

Guruh bosqichi muvaffaqiyatli yakunlandi. Chorak finalda Iroq penaltida engildi – hech narsaga qaramasdan, bir kishi kam bo'lgan jamoa aqlbovar qilmas irodani namoyon qildi. Yarim finalda Yaponiya 2:0 hisobida mag'lub etildi. Finalda esa Saudiya Arabistoni ustun keldi – 0:2. Lekin bu mag'lubiyatdan ko'ra ko'proq umid, kelajak va ishonch ko'zga tashlandi. Yigitlar va ularni boshqargan murabbiy kelgusida Olimpiada masalasini hal qilishga qodir ekanliklarini namoyon etdilar.

2023 yil. Xirosima ertagi takrorlanmadi, lekin yangi tarix yozildi

1994 yildagi Xirosimada qozonilgan oltin medal singari natijani yana kuzatish orzusi so'nmagandi. 29 yildan so'ng Xanchjouda o'tgan Osiyo o'yinlarida Kapadze boshchiligidagi terma jamoa yarim finalgacha etib bordi va tarixda ilk bor bronza medalini qo'lga kiritdi.

Bu muvaffaqiyat osonlikcha kelmadi. Jamoa o'z sinovlarini mahorat bilan engib o'tdi. Etiborlisi – yarim finalgacha etib kelgan yo'lda “sahro lochinlari” yani Saudiya Arabistoni termasi yana to'siq bo'ldi. Lekin bu safar, bronza ham oltin qiymatga ega natijaga aylandi – o'zbek futbolining tarixida ilk bor Osiyo o'yinlarida bronzaga ega chiqildi.

2024 yil. Orzudagi yo'l zafar bilan tugadi

Futbolda har qanday ibtido muvaffaqiyatli yakun talab qiladi. Timur Kapadze olib borgan ishlar 2024 yili o'z mantiqiy nuqtasini topdi. Qatarda o'tgan Olimpiada saralash bosqichi – U-23 Osiyo kubogida O'zbekiston termasi finalgacha etib bordi va Olimpiada yo'llanmasini qo'lga kiritdi.

Bu safar ham kuchli futbolchilar jamlangandi, ammo avvalgilardan farqi – murabbiy faktori edi. Oltin avlod oltin murabbiyga ishondi. Kapadze boshchiligida jamoa nafaqat natija qayd etdi, balki yangi mentalitet bilan o'ynadi. Olimpiadaga chiqish – bu nafaqat musobaqada ishtirok, balki uzoq yillik mehnatning so'nggi mukofoti, tinimsiz harakatlarning cho'qqisi bo'ldi.

2025 yil. Orzular fasli: Jahon chempionati yo'llanmasi

2025 yil - O'zbekiston futbol tarixida tilga olishga arzigulik sana. 5 iyun kuni BAAga qarshi hal qiluvchi o'yinda terma jamoamiz ilk bor Jahon chempionati yo'llanmasini qo'lga kiritdi. Bu natija bir yil ichida amalga oshirilgan ikki ulkan missiyaning mantiqiy davomi edi.

Kapadze Sloveniyalik mutaxassis boshlab bergan ishga so'nggi nuqtani ajoyib tarzda qo'ydi. Bir yil ichida Olimpiada va Jahon chempionati – bu so'zlar bilan tasvirlab bo'lmaydigan yutuq. Bu safargi natijalarda nafaqat mahorat, balki o'zgarishni istagan qalb ovozi, ezgu niyat va ixlos aks etgandi.

Amerikada ko'rishguncha!

Timur Kapadze boshlagan murabbiylik safari yillar davomida o'ziga xos zafar yo'liga aylandi. “Qutqaruv” missiyalaridan boshlangan yo'l Olimpiada va Jahon chempionatigacha olib keldi. Endilikda uning tarixi - o'z yo'li bor, o'z uslubiga ega o'zbek murabbiyi tarixi. Futbolda bazi ismlar borki, ularni bir mavsum, bir g'alaba yoki bir to'siq bilan eslab qolamiz. Ammo shunday shaxslar ham chiqadiki, ular o'z yo'lini bosib o'tadi, bosgan har qadami bilan tarix yozadi. Timur Kapadze aynan shunday shaxs. Uning futbolchilar safidagi faoliyati ham, murabbiylikdagi safarlari ham ezgu orzular, murakkab sinovlar va so'nmas ishonch bilan to'ldi. Bu yo'lda har bir yil bir bosqich, har bir bosqich esa tarixiy zarbalardek mustahkam urilgan lavhalarga aylandi.

Sehrli diyordagi sarguzashtlar oldinda. Biz esa yangi sahifalarga tayyormiz.

Orzu yo'lining muvaffaqiyatli yakuni yoxud har qadamda tarixga kirgan Kapadze