Bugun barcha yosh toifasidagi terma jamoalarida o'ynagan, Osiyoning eng yaxshi yosh futbolchisi bo'la olgan, "O'zbekiston belgisi" ko'krak nishoni sohibi, bugungi kunda "Paxtakor" klubi sharafini himoya qilayotgan Dostonbek Hamdamov o'z tavallud kunini nishonlayapti. Istedodli yarim himoyachimiz bugun 23 yoshga to'ldi. Ayni navqiron, 90 daqiqa yugurib charchamaydigan yosh.

Krishtianu Ronaldu qurshovidagi bolalar orasida Dostonbek Hamdamov ham bor

Dostonbek Hamdamov - 1996 yilning 24 iyul kuni Toshkent viloyatining Bekobod shahrida dunyoga kelgan. "Bunyodkor" futbol akademiyasiga kelgunga qadar Yangier futbol maktab-internatida millionlar o'yini sir-asrorlarini o'rgangan.

Darvoqe, Dostonbek Hamdamov ikki karra Osiyo chempioni bo'lgan uch nafar o'zbekistonlik futbolchidan biri ham hisoblarnadi. O'tgan yili Xitoydagi "qorli final" nomi bilan yodda qolgan qita chempionatida chempion bo'lgan tarkibda Akromjon Komilov, Dostonbek Hamdamov va Javohir Sidiqov bor edi. Bu uchchovlon 2012 yil Eronning Taxti shahrida o'tkazilgan o'smirlar o'rtasidagi U-16 Osiyo chempionatida ham qatnashib, yakunda chempion bo'lishgan edi.

Bugungi qahramonimiz 2015 yilda Osiyoning eng yaxshi yosh futbolchisi deb topilgan. "Bunyodkor" safida O'zbekiston Superkubogini ham qo'lga kiritgan. "Qaldirg'ochlar" safida 2014-2017 yillar oralig'ida to'p tepgan. Joriy mavsumdan esa "Paxtakor" sharafini himoya qilyapti.

Dostonbek O'zbekiston o'smirlar, yoshlar va milliy terma jamoalari tarkibida o'ynagan. Yani, barcha yosh toifalaridagi terma jamoalarda o'ynab, bosqichma-bosqich yuqoriga ko'tarilib borgan. OFK tomonidan har chorakda chop etiladigan "AFC QUARTERLY" jurnalining navbatdagi sonlarining birida Hamdamov bilan intervyu chop etildi. Bu intervyu Dostonbek 2015 yilda Osiyoning eng yaxshi yosh futbolchisi deb topilganidan keyin amalga oshirilgandi.

- O'zbekiston futbolining o'sib kelayotgan yangi avlod vakillaridan biri, OFK tomonidan 2015 yilning eng yaxshi yosh futbolchisi deb taqdirlangan Dostonbek Hamdamov o'tgan mavsum o'zini ko'rsatdi. Klub hamda terma jamoasi uchun porlagan nurga aylandi, - deya boshlangan edi o'sha intervyu.

Hamdamovga ikki savol:

- Qaysi klubga muxlislik qilasiz? Kumiringiz bormi?

- Aniq bir futbolchi yoki klubga muxlislik qilmayman. Chiroyli o'yin tarafdoriman. Chiroyli futbolga muxlislik qilaman.

- Dostonbek Hamdamov futbolga ilk bor kelganida o'z oldiga qanday maqsad qo'ygan? Nimalarni orzu qilgan?

- Maqsadim - Evropa grand klublarida o'ynash bo'lgan. Bundan tashqari yoshligimda "Oltin to'p"ni qo'lga kiritishni orzu qilganman.

Eldor Shomurodov, "Rostov" hujumchisi

- Dostonbek bilan "Bunyodkor" klubida o'ynab yurgan kezlarimizdan buyon yaqin do'stmiz. Turli yosh toifasidagi terma jamoalarda birga o'ynadik. Rossiya chempionatida ham ikkimizga to'p tepish nasib etdi. O'ylaymanki, hali biz o'z so'zimizni aytamiz, birgalikda jahon chempionatida ishtirok etamiz. Fursatdan foydalanib, Dostonbekni bugungi tavallud ayyomi bilan tabriklayman. Bu tabrikka tengdoshlarimiz Otabek Shukurov, Rustam Ashurmatov, Akrom Komilovlar ham qo'shilishadi.

Osiyoning eng yaxshi yosh futbolchisi Dostonbek Hamdamov bugun 23 yoshga to'ldi