Mazkur uchrashuvda dublga erishgan Otabek Narzullaev o'yinning “Eng yaxshi futbolchisi” deya etirof etildi. Shu bois bahs yakuniga etgach, tajribali futbolchidan intervyu oldik.

- Albatta, safarda uch ochkoni qo'lga kiritganimizdan xursandman. O'tgan turda o'z maydonimizda “Orol” bilan durang o'ynaganimiz, bugungi g'alabadan keyin yuvilib ketdi deb hisoblayman. Kimlardir mag'lub bo'lishimizni istagandi. Andijondagi ijobiy natija ularning salomiga alik bo'ldi – deya gap boshladi Otabek Narzullaev.

- Bugungi uchrashuvda universal futbolchi sifatida xarakat qildim. Bilsangiz kerak, oldin asosan himoya chizig'ida o'ynaganman. Bosh murabbiyning ko'rsatmasiga binoan bugun oldingi chiziqdagi sheriklarimga yordam berdim. Aslida ham futbolchi har qanday xolatga tayyor turishi kerak. Qaysi poziciyada bo'lmasin, jamoaga foydam tegsa bundan albatta xursand bo'laman.

- Ochig'ini aytsam, bugungi uchrashuvda gol urishimni oldindan his qilgandim. Chunki bilasizmi Andijondagi stadion men uchun omadli. Bunday deyishimning boisi oldingi yillari ham bu erga qaysi jamoa bilan kelmay, gol urardim. Shuning uchun uchrashuvdan bir kun avval jamoadoshlarimga ertaga ikkita gol uraman deya aytgandim. Niyat xolis ekan, bugun mana ko'rdingiz dublga erishdim.

- “Andijon” ham juda kuchli jamoa. Bu erda tajribali futbolchilar yig'ilgan. Ularning ko'pini yaxshi bilaman. Ilgari birga o'ynaganmiz. Boymatov, Hamroev va Mamalaliev kabi futbolchilarga qanday o'ynash kerakligini yaxshi bilardik. Bu borada murabbiyimiz ham aytib o'tgandi.

- Bugun yigitlar maydonda borini berib, chin ko'ngildan oxirigacha o'ynadi. Safarda qo'lga kiritilgan g'alabada bosh murabbiyimizning xissasi katta degan bo'lardim. Negaki, raqibning o'yinlarini ko'rib, o'rganish jarayonida murabbiyning bergan ko'rsatmalarini bugun bekamu-ko'st bajardik. Yakunda esa uch ochkoni qo'lga kiritdik.

- Andijonlik muxlislarga ham rahmat aytaman. Ular bugungi uchrashuvda bizni ham olqishladi. Bunday muxlislar juda kam. “Andijon”ga kelgusi o'yinlarida omad tilayman – deydi Narzullaev.

Otabek Narzullaev: “O'yindan bir kun avval jamoadoshlarimga ikkita gol uraman deb aytgandim”