Iqtidorli futbolchi 30ta uchrashuvda ishtirok etib, bu borada boshqa jamoadoshlarini ortda qoldirishga erishdi. Farg'onalik futbolchi “Neftchi” klubi tarbiyalanuvchisi sanaladi. Ayni paytda Zokirovga oliy liganing ayrim klublaridan jiddiy qiziqish bo'lmoqda. Otabek bilan suhbatlashib, bir qator savollarga javob oldik.

- Otabek, bu yilgi chempionatda 30ta o'yin o'tkazdingiz. Bu jihat menimcha har qanday futbolchini xursand qilmasdan qolmaydi. Shu jumaladan sizning ham. Lekin jamoangiz kuchlilar safini tark etdi. Mavsum haqida umumiy fikrlaringizni bildirib o'tsangiz?
- Darhaqiqat mavsum-2015 men uchun oldingi yillarga nisbatan omadli kechdi. Bunday deyishimning boisi chempionatning barcha uchrashuvlarida ishtirok etdim. Tabiiyki etarlicha o'yin amaliyotiga ega bo'ldim. Asosiy maqsadim ham joriy mavsum ko'proq o'ynab, tajriba orttirish edi. Ikkinchi tomondan esa “Dinamo” oliy ligadan tushib ketdi. Albatta bu ko'pchilik jamoadoshlarim qatori meni ham ranjitdi. To'g'risi, bunga munosib emasdik. Chunki tarkibimizda mahoratli futbolchilar talaygina edi. Ammo o'zimizning yo'l qo'ygan xatolarimiz evaziga ko'p uchrashuvlarda qimmatli ochkolarni boy berdik. Natijada bu bizga qimmatga tushdi.

- Birinchi davrada klubda moliyaviy muammolar yuzaga kelishi natijasida jiddiy o'zgarishlar ro'y berdi. Bu ham qaysidir manoda salbiy tasirini o'tkazgan bo'lsa kerak?
- To'g'ri, mavsumning birinchi qismida klubda moddiy jihatdan tanqislik bo'ldi. Davralar oralig'iga kelib esa bosh murabbiy va ayrim etakchi o'yinchilar ketishga qaror qildi. Shunga qaramay ikkinchi davrada ham etarlicha kuchayish qilgandik. Ammo tarkib yangilangach, futbolchilarning bir-birini to'liq tushunib ketishlari uchun vaqt talab etilardi.

- Joriy mavsum ikki taniqli mutaxassislar qo'li ostida o'ynashga muvaffaq bo'ldingiz. Avvaliga Tachmurod Agamurodov va keyinchalik Bahrom Hakimov...
- Ha, shunday. Meni Samarqand jamoasiga Tachmurod Shamakovich taklif etgandi. Tajribali murabbiy ekanligini oldin eshitganmanu, lekin bungacha sira birga ishlab ko'rmagandim. Bu yil ushbu mutaxassisning qo'li ostida o'ynadim. Haqiqatdan ham tajribasi yuqori. Yoshlarga ishonch bildirishdan va ularni kashf etib borishdan cho'chimaydi. Mashg'ulotlarda ham taktik jihatlar ustida ko'proq ishlardik. Bahrom Hakimovni ham yaxshi murabbiy deyish mumkin. U kishi ham imkon qadar jamoani oliy ligada qolib qolish uchun borini berib ishladi. Ammo omadsizliklar pand berdi.

- Ko'proq o'yin amaliyotiga ega bo'lganingizni nazarda tutib aytadigan bo'lsak, bu yil samarqandliklar taklifini qabul qilib xato qilmadim deb o'ylaysizmi?
- Ha. Men uchun asosiysi ko'proq o'ynash edi. “Dinamo”da to'liq o'ynadim. Bundan xursandman albatta.

- “Dinamo” oliy liga bilan xayrlashgach, ko'plab futbolchilar o'zlariga boshqa jamoa topishga urinmoqda. Siz ham endi muhitni o'zgartirsangiz kerak?
- Oldimda bir qancha takliflar turibdi. Hozir yaxshilab, shu haqda o'ylab, ko'rib chiqyapman. Yangi jamoamda ham ko'proq o'ynashni istayman. Va bu orqali terma jamoa murabbiylari nazariga tushishga xarakat qilaman. Kelasi mavsumni qaysi jamoada boshlashim yaqin kunlarda aniq bo'ladi.

Islombek Rustambekov suhbatlashdi.

Otabek Zokirov: “Eng muhimi bu yil ko'proq o'yin amaliyotiga ega bo'ldim”