Mazkur turda ham muxlislar ajoyib qarama-qarshiliklarga guvoh bo'lishlari mumkin. Xususan, Andijonda vodiy derbisi, Olmaliqda Toshkent viloyati derbi bo'lib o'tadi. Biz odatdagidek, hakamlarning jamoalar bilan bog'liq statistikasini tanishtiramiz.

Oliy liga. 4-tur
9 aprel (shanba)
QO'QON-1912 - BUXORO
Bosh hakam: Hasan Ro'ziev (Toshkent).
Qo'qonda bo'lib o'tadigan uchrashuvni boshqarib boradigan Hasan Ro'zievni mezbonlar uchun omadli hakam desa bo'ladi. Boisi, "Qo'qon-1912" o'tgan mavsum Ro'ziev hakamligida ikkita o'yinda maydonga tushib, mag'lubiyatga uchramagan. "Andijon" bilan nursiz durang o'ynalgan bo'lsa, "Dinamo" mag'lubiyatga uchratilgan. Har ikkala bahs ham Qo'qonda bo'lib o'tgan, bugungi uchrashuvda ham mezbon "Qo'qon-1912".

2015 yil Hasan Ro'ziev "Buxoro" ishtirokidagi bittagina o'yinni boshqargan. O'sha bellashuvda mezbonlar g'alaba nashidasini surgan. Qaysidir manoda Ro'ziev har ikkala jamoaga ham omadli hakam deyish mumkin.

2015 yil. "Qo'qon-1912" ishtirokidagi uchrashuvlar
QO'QON-1912 - ANDIJON - 0:0
QO'QON-1912 - DINAMO - 3:1

"Buxoro" ishtirokidagi uchrashuv
BUXORO - ANDIJON - 2:1

ANDIJON - NEFTCHI
Bosh hakam: Vadim Agishev (Toshkent).
Vodiy derbsini poytaxtlik Vadim Agishevga ishonib topshirilgan. O'tgan mavsum bugungi uchrashuvning mezboni bo'lmish "Andijon" Agishev hakamlik qilgan ikki o'yinda ham g'alaba neligini bilmagan. O'z uyida "Sho'rtan" bilan durang o'ynagan, safarda "Bunyodkor"ga yirik hisobda yutqazgan.

Aksincha, "Neftchi" Agishev boshqargan uchta o'yinda umuman yutqazmagan. Toshkentda "Lokomotiv" bilan durang o'ynalgan, keyin Farg'onada "Paxtakor" va "Qizilqum" mag'lubiyatga uchratilgan. Agishev hakamligidagi bugungi vodiy derbisida vaziyat qanday bo'lishini sanoqli soatlardan keyin bilib olamiz.

2015 yil. "Andijon" ishtirokidagi uchrashuvlar
ANDIJON - SHO'RTAN - 0:0
BUNYODKOR - ANDIJON - 4:0

"Neftchi" ishtirokidagi uchrashuvlar
LOKOMOTIV - NEFTCHI - 1:1
NEFTCHI - PAXTAKOR - 3:2
NEFTCHI - QIZILQUM - 2:0

OBOD - QIZILQUM
Bosh hakam: Ravshan Ermatov (Toshkent).
Ravshan Ermatov "Obod" uchun qanday hakam ekanligini bugun bilib olamiz. "Qizilqum" esa, o'tgan yili bu borada xulosa chiqarib olgan bo'lishi tabiiy. Sababi, "oltin izlovchilar" Ermatov hakamlik qilgan uch o'yinning ikkitasida oliy liga etakchilari "Lokomotiv" va "Nasaf"ga yutqazgan. Faqat "Qo'qon-1912" mag'lubiyatga uchratilgan.

2015 yil. "Obod" ishtirokidagi uchrashuvlar
Yo'q

"Qizilqum" ishtirokidagi uchrashuvlar
QIZILQUM - QO'QON-3:1
LOKOMOTIV - QIZILQUM - 1:0
QIZILQUM - NASAF - 1:2

OLMALIQ - METALLURG
Bosh hakam: Dmitriy Pislegin (Toshkent).
Poytaxt viloyati "derbsi"ni ham poytaxtlik hakam boshqarib boradi. 2015 yil oliy ligada 9ta uchrashuvni boshqargan Pisleginning 5tasi bugungi juftlikdagi jamoalar ishtirokidagi bahslarga to'g'ri keladi. "Olmaliq" hisobida 1ta g'alaba, 1ta mag'lubiyat bo'lsa, "Metallurg"da uchchala natijadan ham bittadan bor. Yani, bir g'alaba, bir durang va bir mag'lubiyat.

2015 yil. "Olmaliq" ishtirokidagi uchrashuvlar
BUXORO - OLMALIQ - 0:4
QIZILQUM - OLMALIQ - 3:1

"Metallurg" ishtirokidagi uchrashuvlar
DINAMO - METALLURG - 1:0
SHO'RTAN - METALLURG - 0:3
LOKOMOTIV - METALLURG - 1:1

MASH'AL - NAVBAHOR
Bosh hakam: Temur To'xtasinov (Andijon).
Andijonlik Temur To'xtasinov boshqaruvidagi uchrashuvda "Mashal" 2015 yil safarda "Dinamo"dan ustun kelgan edi. Bugun safarda to'p suradigan "Navbahor" esa, o'z uyida "Metallurg"ni mag'lubiyatga uchrata olmay, mehmonda "Sho'rtan"ga yutqazib qo'ygan.

2015 yil. "Mashal" ishtirokidagi uchrashuv
DINAMO - MASH'AL - 0:1

"Navbahor" ishtirokidagi uchrashuvlar
NAVBAHOR - METALLURG - 2:2
SHO'RTAN - NAVBAHOR - 3:1

Furqatbek Nishonov

O'tgan yil Agishev boshqargan o'yinlarda "Neftchi" umuman yutqazmagan