- Oybek Xitoy safari taassurotlari bilan o'rtoqlashsangiz.
- Xitoyga qilgan safarimiz juda omadli bo'ldi. Biz u erda bosh murabbiyimiz Jasur Abduraimov boshchiligida 4 jamoa ishtirok etgan halqaro turnirda ishtirok qatnashdik. Dastlab Xorvatiya, keyin mezbonlar va so'nggi o'yinda Filippin terma jamoalarini mag'lubiyatga uchratib, turnir g'olibi bo'ldik. Safarga ketishda oldimizga qo'yilgan vazifani bajardik.

- Murabbiylar o'yiningizdan qoniqishdimi?
- Murabbiylarimiz barchamizni maydonda sinab ko'rishdi. Men ham har uchala o'yinda maydonga tushdim. Harakatlarim ularga yoqdimi yoki yoqmadimi bilmadim, lekin keyingi yig'inlarga tayyor turishimni aytishdi. Uyga vazifalarni berishdi. O'z ustimda qanday ishlashim haqida maslahatlar berishdi.

- Terma jamoada qaysi chiziqda harakat qildingiz?
- Xorvatiyaga qarshi o'yinda himoya chizig'ida xarakat qildim. Xitoy va Filippin bilan o'yinlarda esa tayanch yarim himoyachi vazifasini bajardim.

- Mana yangi mavsum ham boshlanish arafasida. Nima deb o'ylaysiz murabbiylar sizga asosiy jamoada ishonch bildirishadimi?
- Jamoamiz bosh murabbiyi Murod Ismoilov biz yoshlarga katta etibor qaratmoqda. Mashg'ulotlarda bizni doim asosiy tarkibga tayyor bo'lishimizni uqtirib kelmoqda. Mavsumga tayyorgarlik chog'ida bo'lgan o'rtoqlik o'yinlarida men kabi yoshlarni asosiy tarkibga tushurib sinovdan o'tkazib turdilar. Endi bu yog'igayam bo'sh kelmaymiz, imkon bo'lgan taqdirda murabbiylar va muxlislarning ishonchlarini qozonishga harakat qilaman. Boshlanayotgan chempionatimizda jamoamizga omad tilayman. O'ylaymanki jamoamiz bu yil ijobiy natijalar bilan Qo'qonlik muxlislarni xursand qiladi.

Akramjon Mamadaliev suhbatlashdi.

Oybek Rustamov: "Murabbiy va muxlislar ishonchini qozonishga harakat qilaman"