OSIYO KUBOKLARI HAQIDA

Osiyo futbol konfederaciyasida qita mamlakatlari klublari o'rtasidagi turnir 1967 yildan boshlangan. Dastlabki turnir OSIYO KLUBLARI CHEMPIONATI deya nomlangan. Bu nom ostida qita klublari 1971 yilgacha musobaqalashishgan. 1972-1985 yillar davomida Osiyoda klublar o'rtasida musobaqa o'tkazilmagan. 1986 yildan OFK ikkita yirik turnirga asos solgan. O'z mamlakatida chempion bo'lgan klublar OSIYO CHEMPIONLARI KUBOGIda ishtirok etgan bo'lsa, kubok sohiblari OSIYO KUBOK EGALARI KUBOGIda bahs yuritishgan. Qita miqyosidagi har ikki turnir 2002 yilga qadar muntazam o'tkazilgan. 2002 yildan esa har ikki turnir birlashtirilib OSIYO CHEMPIONLARI LIGASIga asos solindi. 2008 yildan boshlab bu turnir yanada takomillashtirildi va Osiyo reytingida yuqori o'rinda bo'lgan jamoalar OSIYO CHEMPIONLAR LIGASIda qatnashadigan bo'ldi. Reytingda pastroq bo'lgan jamoalar uchun esa 2004 yilda tashkil etilgan OFK KUBOGI turnirida qatnashadigan bo'ldi.

O'ZBEKISTON JAMOALARI OSIYO KUBOKLARIDA

Mamlakatimiz jamoalari Osiyo miqyosidagi klublar o'rtasida o'tkaziladigan turnirlarga 1994 yildan ishtirok eta boshlashgan. 1994-2002 yillar mobaynida OSIYO CHEMPIONLARI KUBOGIda yurtimizdan 4 jamoa ishtirok etgan. Farg'onaning “Neftchi”, Toshkentning “Paxtakor”, Namanganning “Navbahor” va Qarshining “Nasaf” jamoalari bu turnirda qatnashib, umumiy hisobda 35 uchrashuv o'tkazishgan. OSIYO KUBOK EGALARI KUBOGIda esa yurtimizdan “Paxtakor”, “Navbahor”, “Neftchi”, “Yangier” va “Samarqand-Dinamo” jamoalari ishtirok etishib, umumiy hisobda 32 o'yinda maydonga tushishgan. 2002 yildan OSIYO CHEMPIONLARI LIGASI musobaqalarida mamlakatimizdan “Paxtakor”, “Neftchi”, “Mashal”, “Bunyodkor”, “Nasaf” va “Lokomotiv” ishtirok etgan bo'lib, bugungacha ular ishtirokidagi o'yinlar soni 254tani tashkil etadi. 2004 yildan faoliyatini boshlagan OFK KUBOGIda “Neftchi”, “Nasaf” va G'uzorning “Sho'rtan” jamoalari umumiy hisobda 40 o'yin o'tkazishgan.

AGMK 11-JAMOA

AGMK Osiyo miqyosidagi klublar o'rtasida tashkillashtirilayotgan xalqaro turnirlarda O'zbekiston sharafini himoya etishi kutilayotgan 11-jamoa bo'ladi. 1994 yildan hozircha davr mobaynida mamlakatimiz sharafini himoya etgan jamoalar statistikasi quyidagicha:

PAXTAKOR – 104 o'yin, 46 g'alaba, 18 durang, 40 mag'lubiyat, to'plar nisbati 166-148.
BUNYODKOR - 81 o'yin, 27 g'alaba, 22 durang, 32 mag'lubiyat, to'plar nisbati 90-104.
NASAF – 55 o'yin, 25 g'alaba, 11 durang, 19 mag'lubiyat, to'plar nisbati 86-67.
NEFTCHI – 42 o'yin, 19 g'alaba, 5 durang, 18 mag'lubiyat, to'plar nisbati 74-64.
LOKOMOTIV – 30 o'yin, 7 g'alaba, 10 durang, 13 mag'lubiyat, to'plar nisbati 41-45.
NAVBAHOR – 17 o'yin, 6 g'alaba, 4 durang, 7 mag'lubiyat, to'plar nisbati 32-32.
MASH'AL – 6 o'yin, 2 g'alaba, 2 durang, 2 mag'lubiyat, to'plar nisbati 7-11.
SHO'RTAN – 6 o'yin, 1 g'alaba, 3 durang, 2 mag'lubiyat, to'plar nisbati 10-10.
YANGIER – 4 o'yin, 2 g'alaba, 1 durang, 1 mag'lubiyat, to'plar nisbati 6-4.
SAMARQAND-D – 2 o'yin, 2 mag'lubiyat, to'plar nisbati 5-7.

O'zbek klublari Osiyo Kuboklarida