Ubirajara Veyga da Silva 23 martda COVID-19 tufayli bu hayotdan ko'z yumdi.

U 1955 yil 2 fevralda Braziliyaning Portu-Alegri shahrida tug'ilgan. Shu erdagi Jismoniy tarbiya oliy maktabining futbol yo'nalishida tahsil olgan. U murabbiylik faoliyatini San-Paulu shtati jamoalarida boshlagan. Asosan, Braziliya A2 va A3 Seriyasining klublarida ishlagan. "Operario PR"da faoliyat olib borib, milliy etirofga sazovor bo'lgan. Klub uning boshchiligida Braziliyaning mashhur jamoasi "Palmeyras"ni Kubok bahslaridan chiqarib yuborgan.

1997 yil kuzida Toshkentning "Paxtakor" jamoasiga taklif qilingan hamda bosh murabbiy Aleksandr Ivankovning yordamchisiga aylangan. Shunisi etiborliki, da Silva klubda bosh murabbiy assistenti sifatida ishlab turib, o'sha yilning oktyabr oyi oxirida O'zbekiston milliy terma jamoasini boshqargan. Jamoa uning boshchiligida Jahon chempionati-98 saralash bosqichidagi so'nggi ikki uchrashuvni o'tkazgan (Qozog'iston - 4:0 va Birlashgan Arab Amirliklari - 0:0).

1998 yilning yanvar oyida "Bira Veyga" (uning laqabi) "Paxtakor" bosh murabbiyiga aylangan. Toshkentliklar uning rahnamoligida 1992 yildan beri birinchi marta O'zbekiston chempioni bo'lgan.

Da Silva bunga parallel ravishda terma jamoa bilan ishlashni davom ettirgan. Tailandda bo'lib o'tgan Osiyo o'yinlarida braziliyalik mutaxassisga omad kulib boqmagan: O'zbekiston terma jamoasi yarim finalga chiqmasdan muvaffaqiyacizlikka uchragan. Bu esa Silvaning terma jamoadan chetlatilishiga sabab bo'lgan. 1999 yil yanvar oyida "Paxtakor"dan ham ketgan. U Braziliyaga qaytib, mamlakatning shimoli-sharqiy mintaqalaridagi klublar bilan ishlagan va keyinchalik Yaponiya klublariga murabbiylik qilgan.

O'zbekiston milliy terma jamoasi sobiq bosh murabbiyi vafot etdi