Mazkur musobaqa Qatarda bo'lib o'tadigan 17 yoshgacha futbolchilar o'rtasidagi FIFA Jahon chempionatiga saralash vazifasini ham o'tab beradi. Musobaqaning eng yaxshi 8 ta jamoasi 2025-yilgi o'smirlar o'rtasidagi mundialda ishtirok etish huquqini qo'lga kiritadi.
O'zbekiston U-17 terma jamoasi avvalgi turnirlarning 10 tasida (1994, 1996, 2002, 2004, 2008, 2010, 2012, 2014, 2016, 2023) ishtirok etgan va raqiblar darvozasiga 74 ta gol kiritgan. Shuningdek, jamoamiz 46 uchrashuvda 19 g'alaba, 10 durang va 17 mag'lubiyat qayd etgan.
Mamlakatimiz ikki bor – 2008 va 2010-yillarda o'smirlar o'rtasidagi Osiyo kubogiga mezbonlik qilgan. 2010-yilgi turnirda Aleksey Evstafeev boshqaruvidagi o'smirlar jamoamiz finalga qadar etib borgan va yakunda kumush medallar bilan taqdirlangan. Aynan ushbu turnirda Timur Hakimov eng yaxshi futbolchi va musobaqa to'purari bo'lgan.
Ushbu yosh toifasidagi eng katta yutug'imiz, shubhasiz, 2012-yilda qayd etilgan. Eronda o'tkazilgan qita birinchiligida Dilshod Nuraliev boshqaruvidagi O'zbekiston U-16 terma jamoasi g'oliblikni qo'lga kiritgan.
2023-yil Tailand mezbonlik qilgan Osiyo kubogida Jamoliddin Rahmatullaev boshchiligidagi O'zbekiston U-17 terma jamoasi yarim finalga qadar etib borgan va 11 yillik tanaffusdan so'ng, U-17 Jahon chempionati yo'llanmasiga ega chiqqan.
Izohlar