"Guruh bosqichini g'olib jamoa sifatida yakunlab oldik. Jahon chempionatida o'yindan o'yinga kuchayib borish juda muhim. Biz o'z yo'limizda davom etishimiz kerak. Pley-offdagi dastlabki raqibimiz Qozog'iston terma jamoasi aqlli va samarali futzal bo'yicha dunyoda etakchi. Ular juda ham aqlli. Qozog'iston dunyodagi eng yaxshi shakllangan jamoalardan biri. Bosh murabbiy Rikardo Kaka esa shunchaki daho", - deya fikr bildirdi Jorje Braz.

Shuningdek, bosh murabbiyi O'zbekiston terma jamoasining mundialdagi ishtiroki bo'yicha o'z fikrlari bilan o'rtoqlashdi.

"O'zbekiston kuchli jamoa ekanligini isbotlay oldi. Sizlar hozir natijadan aniq xafasizlar, ammo terma jamoangiz o'yinni tashkil etishda va o'yin davomida tezkor o'zgarishlar qila olishi bilan meni hayron qoldirdi. Jahon chempionatida har bir detallar muhim rol o'ynaydi. Bilasizmi, terma jamoangiz yaxshi o'ynaydi, to'pga egalik qiladi, xavfli vaziyatlar yaratadi, biroq qarshi hujumda gol o'tkazib yuboradi. Ushbu scenariy guruh bosqichining barcha uchrashuvlarida takrorlandi. Darvozabon ham bir nechta xatolarga yo'l qo'ydi. Bunday alamli gollar o'tkazib yuborgandan keyin o'yinga qaytish oson emas. Ruhiyat ham o'z tasirini o'tkazgan. To'g'ri, mundialdagi natija yaxshi bo'lmagandir, ammo mamlakatingizda futzal o'sib bormoqda. Shunday davom etinglar, biz guruhda qolib ketdik deb futzalni tashlab qo'ymanglar, iltimos. Keyingi Jahon chempionatiga qadar shunday rivojlanishda davom etishingizlarni tilab qolaman", - dedi Portugaliya terma jamoasi ustozi.

Eslatib o'tamiz, amaldagi Jahon chempionlari 1/8 final bosqichida Qozog'iston terma jamoasiga qarshi bahs olib boradi. Uchrashuv 26 sentyabr kuni Andijon shahrida soat 20:00da start oladi.

Abdulvosit Bektemirov suhbatlashdi

"O'zbekiston raqibdan yaxshiroq o'ynab turib, gollar o'tkazib yubordi" - Portugaliya terma jamoasi bosh murabbiyi O'zbekistonning mundialdagi ishtiroki haqida