Kecha mazkur musobaqaning guruh bosqichi uchrashuvlariga qura tashlandi. Yakuniy natijalarga ko'ra vakillrimiz Ispaniya, Mali va Kanada bilan bir kvartetdan o'rin oldi. Saytimiz muxbiri Abdulaziz Iskandarov bu borada terma jamoamiz sardori Lazizbek Mirzaevning fikrlari bilan qiziqib ko'rdi.

"Qura tashlash marosimida Ispaniya terma jamoasini kutgan edim. Baribir Evropani top jamoalaridan biri tushishi aniq edi. Ularning kattalar terma jamoalari qanday natijalar qo'lga kiritganini, Jahon va Evropa chempionlari bo'lganini bilamiz. Shaxsan o'zim ularni ko'p kuzatganman. Kanadada ham futbolga etibor yaxshi, deya olaman. Sovuq mamlakat bo'lgani uchun Indoneziyada qiynalishsa kerak. Afrika jamoalari esa har bir yosh toifasida kuchli hisoblanadi. Uchta terma jamoa ham bir-biriga etarlicha qarshilik ko'rsatadi, deya olaman.

Bizga kim tushishidan qatiy nazar har doim g'alaba uchun maydonga chiqamiz. Bu barchamiz uchun ilk Jahon chempionati. Turnirdan ko'p narsa kutmoqdamiz. Maqsadimiz finalgacha etib borish va chempion sifatida ortga qaytish. Bu oson bo'lmaydi. Barchamiz oldimizda qanday ishlar borligini sezib turibmiz.

Jahon chempionati futbolchilar uchun katta imkoniyat va motivaciya hisoblanadi. Bunday saviyadagi turnirda qatnashish har doim foyda beradi, deb o'ylayman. Musobaqada imkon qadar jamoamga yordam berishga va ko'p gol urishga harakat qilaman. Kamida paslarim bilan samara keltirishni istayman",- deydi Lazizbek Mirzaev.

O'zbekiston U-17 sardori Lazizbek Mirzaev: "Jahon chempionati har bir futbolchi uchun katta motivaciya va imkoniyat hisoblanadi"