– Yaqinda O'zbekiston terma jamoasi shtabiga qo'shilganingiz haqida xabar topdik. Sizni shaxsan Fabio Kannavaro taklif qildimi? Uning shtabidagi dastlabki taassurotlaringiz qanday?

– Men Fabio Kannavaro tomonidan Dubaydagi turnir uchun taklif qilinganman. Musobaqa yakunlanganidan so'ng, o'zim ishlaydigan klub – “Bunyodkor” ixtiyoriga qaytaman. Janob Kannavaro professional murabbiy va u bilan ishlash imkoniyatiga ega bo'lganim katta sharaf. Uning shtabi ham malakali mutaxassislardan iborat va men O'zbekiston milliy terma jamoasi ishonchli qo'llarda ekanligiga hamda porloq istiqbolga ega bo'lishiga to'la ishonch bildiraman.

– Sizning vataningiz hisoblangan Italiya jahon chempionati saralash bosqichi doirasidagi oxirgi o'yinda Norvegiyaga yirik hisobda yutqazib, to'g'ridan-to'g'ri yo'llanmani qo'lga kiritish imkoniyatini boy berdi. Ularning imkoniyatini qanday baholaysiz? Nega Italiya avvalgi nufuzini yo'qotmoqda?

– Italiya endilikda mundialga chiqish uchun pley-off bosqichida ishtirok etishi kerak. Italiyaning jahon chempionatiga yo'l olishiga ishonchim komil. Biz bunga ishonishimiz kerak, chunki terma jamoa barcha italiyaliklarning qo'llab-quvvatlashiga muhtoj. Italiya o'z obro'sini yo'qotmagan deb hisoblayman; bizda hali ham dunyoning eng yaxshilaridan biri bo'lgan murabbiylik maktabi bor va besh yil oldin Evropa chempionligini qo'lga kiritganimizni unutmaslik lozim. Italiyaga qarshi o'ynash har doim har qanday raqib uchun qiyin vazifa bo'lib kelgan.

– Xabaringiz bo'lsa kerak, o'smirlar o'rtasidagi jahon chempionati nimchorak finalida Italiya va O'zbekiston bir-biriga raqiblik qiladi? Jamoalarning imkoniyatlarini qanday baholaysiz? Ushbu bahsda Italiyaga muxlislik qilasizmi?

– Shubhasiz, mazkur jamoalar o'rtasida ajoyib bellashuv guvohiga aylanamiz. Ishonchim komilki, navbatdagi bosqichga yo'l oladigan jamoa qattiq ter to'kishiga to'g'ri keladi. Tabiiyki, o'zim italiyalik bo'lganim uchun Italiyaga muxlislik qilaman, biroq O'zbekiston g'alaba qozonsa ham xursand bo'laman, chunki bu mamlakat mening ikkinchi uyimga aylangan. Bir yildan buyon Toshkentda istiqomat qilaman va umid qilamanki, Ilyos Zeytullaev bilan “Bunyodkor”dagi faoliyatimni davom ettiraman. U bilan juda yaxshi til topishdik. Fikrimcha, Superliga yakuniga ikki tur qolgan bo'lsa-da, chempionatda yuqori darajada ishtirok etdik.

Oqil Abdubarnoev suhbatlashdi.

O'zbekistonning italiyalik tahlilchisi Kannavarodan taklif, "Squadra Azzurra"ning muvaffaqiyatsizligi hamda U-17 jahon chempionati nimchorak finali haqida gapirdi