У мустаҳкам бўлсагина яхши мева бера олади, юксак чўққиларга чиқа олади. Биладики у ҳеч нарсадан қўрқмайди, чунки "фундамент" мустаҳкам.

Миллий терма жамоадан тортиб қолган ёш тоифаларига футболчи етказиб беришда азалдан "Пахтакор" "база" вазифасини ўтаб келгани сир эмас. Миржалол Қосимовдан тортиб Азамат Абдураимовларгача, Бугалони айтамизми ёки Ширшов тарих зарварақлари бунга гувоҳ.

Аввалги мақолаларда айтганимиздек "Пахтакор"нинг сўнгги йилларда тўғри йўлга тушиб ўз мактабига катта эътибор қаратаётгани ўз самарасини кўрсатмасдан қолмаяпти. Дарҳақиқат, клуб трансфер сиёсатида ҳам, футболчи етказиб беришда ҳам етакчиликни яна қўлга олмоқда. Биргина Улуғбек Ҳошимовни сотиш ва ортга қайтариш орқали клуб икки карра маблағ ишлади. Муҳаммадали Ўринбоевни Европа клубига трансфер қилди, бир пайтлар ЦСКАга йўл олган Аббос Файзуллаевдан улуш олди, Азмиддинов ва Маҳамаджоновлар ҳам текинга кетмади.

Энди мавзуга келсак, "Пахтакор"дан бу йилнинг (охирги йиғиндаги рўйхат асосида) ўзида барча терма жамоаларга жами 35 нафар футболчи жалб қилинди. Бу ўз-ўзидан бўлаётгани йўқ албатта. Хожиакбар Алижонов, Игорь Сергеев, Хожимат Эркинов, Жамшид Искандеров, Остон Ўруновлар шулар жумласидандир.

Гарчанд ҳали очилмаган бўлсада, Қибрайда "AKFA Xolding" томонидан 96 кишилик янги бино қурилди. Инфратузилма йилдан-йилга яхши томонга ўзгармоқда. Кучли инфратузилма янада янги номларни юзага чиқаришида муҳим омил бўлиб хизмат қилиши аниқ.

Халқаро спорт тадқиқотлари маркази яъни CIES экспертлари эса буни ўрганиб борган ҳолда "Пахтакор"ни Жаҳоннинг энг яхши юзта академиялари қаторига киритди. Клуб расмий учрашувларда қатнашган жами 57 нафар футболчини тайёрлаб берган. "Шерлар" 49 та лигадан олинган 100 та академия ичида 90-ўринни банд қилган. Рўйхат карвонбошиси Португалиянинг "Бенфика" клуби ҳисобланади. Кейинги ўринларни "Барселона" ва "Ривер Плейт" академиялари эгаллаган.

Умид қиламизки, кейинги йилларда бу рўйхатдан яна бир нечта ўзбек клублари жой олади. Ўзбекистонда биргина "Пахтакор" эмас, "Бунёдкор", "Насаф" клубларининг футбол мактаблари ҳам борлигини, улар ҳам миллий терма жамоа йўлида яхши ижрочиларни етиштириб бераётганини қайд этиб ўтишимиз жоиз. "Пахтакор" эса бу йўлда яна дадил қадамлар билан олдинга интилишда давом этади ва ўз ўрнини мустаҳкамлашига ишонамиз.

"Пахтакор" академияси энг яхши мактаблар юзталигига кирди