O'yin uchun sotuvga chiqarilgan 27 000ta chipta o'z egasini topdi. Undan tashqari yana o'n mingga yaqin muxlis stadionga kirdi. 35 000 nafardan oshiq muxlisni o'z bag'riga sig'dirgan "Paxtakor" Markaziy stadioni so'nggi marotaba 2012 yil to'lgandi. O'shanda terma jamoamiz Janubiy Koreya terma jamoasiga qarshi bahs olib borganlar va o'yinda 2:2 hisobi qayd etilgan edi.

2011 yil 11 noyabr kuni bo'lib o'tgan O'zbekiston - KXDR o'yinida ham "Paxtakor" Markaziy stadioniga 30 000 nafar muxlis tushgan. Qizig'i shundaki, so'nggi yillarda "Paxtakor" Markaziy stadioni koreyaliklarga qarshi o'yinlarda to'lyapti. 2010 yil aynan noyabr oyining ettinchi sanasida O'zbekiston o'smirlar terma jamoasi Osiyo chempionatining finalida KXDRga imkoniyatni boy beradilar. Mana shu o'yinda qaydnomaga 35 000 muxlis yozilgan bo'lsada, stadiondagi muxlislar soni 45 000 nafarga yaqin edi. O'yin boshlanishiga 30 daqiqa qolganida barcha kirish eshiklari yopilgan va tashqarida yana o'n mingga yaqin muxlis qolib ketgan.

Kuni kecha bo'lib o'tgan uchrashuvda ham stadionga kira olmagan muxlislar ko'pchilikni tashkil etdi.

Hammadan ham, davlatimiz madhiyasi yangragan vaziyatda ko'tarilgan ulkan bayroq stadionga o'zgacha chiroy berdi.

"Bu bayroqni "JAR" stadionida ko'targan edik. O'shanda stadionning bir tomoni to'liq bayroq bilan qoplangan edi. "Paxtakor"da ham u chiroyli ko'rinish oldi. Hisob 0:1 bo'lib turgan vaziyatda bir narsadan cho'chidim. Ishqilib stadionga kelgan muxlislar futbolchilarimizni haqorat qilmasinlar deb turgandim. O'ylaganimdek bo'lmadi. Shu kuni stadionga kelgan 30 mingdan ortiq muxlisning barcha barchasi 90 daqiqa davomida terma jamoamizni qo'llab - quvvatlab turdilar. Buning uchun muxlislar klubi va futbolchilarimiz nomidan ularga minnatdorchilik bildiramiz. Futbolchilarimizga esa bizni qiyin vaziyatdan olib chiqib ketganliklari uchun rahmat aytamiz. Toshkentda bo'lib o'tadigan keyingi ikkita o'yinda sizlarni yolg'izlatib qo'ymasylikka vada beramiz, ammo sizlar ham biz uchun g'alaba taqdim etishlaringiz kerak bo'ladi", - deydi O'zbekiston terma jamoasi muxlislar klubi sardori Abdurahmon Fozilov.

"Paxtakor" stadioni 2012 yildan keyin birinchi marotaba muxlislar bilan to'ldi