Andijonda "kesakdan olov chiqdi"

Autsayderlar hududida (12-o'rin) borayotgan Kumikov shogirdlari endi har bir ochko uchun tish-tirnog'i bilan kurashishi aniq. Amaldagi chempion ustidan qozonilgan g'alaba ularning kayfiyatini ko'targani aniq. Biroq, navbatdagi raqib ham anoyilardan emas - Baxtiyor Ashurmatov boshchiligidagi "Qo'qon-1912" (9-o'rin). Nega bunday deyilayotganini material oxirida bilib olasiz. Hozir esa o'zaro uchrashuvlar tarixiga nazar solamiz.

28-uchrashuv

Ertaga o'tkaziladigan o'yin jamoalar o'rtasida O'zbekiston chempionatlari doirasidagi 28-si bo'ladi. Bu boradagi kichik ustunlik "Qo'qon-1912" tomonida. 27 o'yinning 9 tasida "Andijon"ning qo'li baland kelgan bo'lsa, 11 o'yin qo'qonliklarning foydasiga hal bo'lgan (7 durang). Ammo to'plar nisbati hozircha andijonliklar ustunligini ko'rsatib turibdi - 44:40 (+4).

Eng yirik g'alaba

Jamoalarning so'nggi yillardagi o'yinlarida 3 tadan oshiq gol urilmayapti. Ammo XX asr oxirida barchasi boshqacha edi. "Andijon" va "Qo'qon" o'rtasidagi to'qnashuvlar har doim gollar shousiga aylangan. "Shunqorlar"ning eng katta g'alabasi 1999 yilgi mavsumning 11-turida qayd etilgan (5:1). "Andijon" esa 1 yil avval "Qo'qon-1912" darvozasiga javobsiz 6 ta gol urib, eng yaxshi natijasini o'rnatgan edi. Mazkur klublar o'rtasidagi o'yinlarda 2 bor 8 tadan gol urilgan va har gal "burgutlar" zafar quchishgan.

2000 yilgi mavsumning 33-turi, "Andijon" 6:2 "Qo'qon-1912"
2002 yilgi mavsumning 28-turi, "Andijon" 5:3 "Qo'qon-1912"

Oxirgi o'yin

Superliga joriy mavsumining 7-turida "Qo'qon-1912" "Bobur Arena"da mehmon bo'lgandi. O'shanda Baxtiyor Ashurmatov shogirdlarining g'alabasi qayd etilgan (1:2). Mo'minjon Meliev va Muhammadanas Hasanovning gollariga "Andijon" safida Martin Boake javob qaytargandi.

"Andijon"dan g'alabasiz seriya

Yuqorida Qo'qon jamoasining "burgutlar"ga noqulay raqib ekani haqida gapirdik. Shu tufayli Viktor Kumikov shogirdlarining ehtimoliy g'alabasi aniq sensaciya sifatida qabul qilinadi. Aniqroq tushunishingiz uchun aytamiz, "Andijon" 18 yildan beri "shunqorlar"ni mag'lubiyatga uchrata olmayapti. Bu orada o'tkazilgan 9 o'yinning 6 tasida "Qo'qon-1912" 3 ochkolik bo'lgan, 3 ta durang.

ANDIJON - QO'QON-1912 - 1:0 (0:0)
05.08.2003. 16-tur. Andijon. "Navro'z" o'yingohi. 8000 tomoshabin.
Bosh hakam: D. Roman - 6
Gol:
1:0 - Baxtiyor Hamidullaev, 74
Golga aylanmagan penalti:
Jadigerov Asqar (ANDIJON), 63
ANDIJON: Beloshapka Boris; Sharipov Sherzod; Zaxarov Andrey; Pulatov Maruf; Jadigerov Asqar (Qurbonboev Rustam, 73); Azizov Afzal; Gafarov Seyran; Hamidullaev Baxtiyor; Baqoev Ulug'bek (Polatov Alisher, 81); Xazigaliev Ilnur; Asqaraliev Sanjar (Kotelnikov Vadim, 73)
QO'QON-1912: Zaxareckiy Sergey; Ayzatulov Timur; Namozov Baxtiyor; Jonaliev Axdam; Nizometdinov Muxsin; Raximov Ibroxim (Mansurov Mamur, 85); Raxmonqulov Shuxrat; Azimov Baxrom; Abduvaliev Muxiddin (Hasanov No'mon, 53); Yusupov Shuxrat; Inog'omov Rahmat (Maxmudov Xayrullo, 53)
Ogohlantirishlar: Azimov Baxrom, 14; Sharipov Sherzod, 31; Namozov Baxtiyor, 41; Jonaliev Axdam, 63; Xasanov Numon, 63; Baqoev Ulug'bek, 77; Maxmudov Xayrullo, 83; Hamidullaev Baxtiyor, 85

Xullas, 9 o'yindan beri "Qo'qon"ni yutolmayotgan "Andijon" kelasi yilni ham Superligada boshlashni istasa, ertaga 3 ochko olishi zarur. Nima deb o'ylaysiz, Kumikov Toshkent vaqti bilan 16:00 da boshlanadigan "jangda" Ashurmatovdan ustun kela oladimi?

Norchaevning kumiri kim? Uning gollari otasini xursand qilmadimi?

"Paxtakor"dan keyin "Qo'qon". Kumikovdan yana sensaciya ko'ramizmi?