Unga ko'ra, "sherlar" yangi mavsumni to'q ko'k (yoki indigo) va oq rangli liboslarda o'tkazadi. Zamonaviy va klassik detallarni o'zida mujassam etgan ushbu to'plam jamoaning ananalariga sodiq qolgan holda, minimalistik uslubda ishlab chiqilgan.

Libosning ko'krak qismi o'ng tomonida jamoaning texnik homiysi – Germaniyaning mashhur "Adidas" kompaniyasining yangilangan logotipi o'rin olgan bo'lsa, chap tomonda klubning ananaviy emblemasi tushirilgan. Ularning markazida esa O'zbekiston Respublikasi davlat bayrog'i aks ettirilgan. Futbolkaning qoq markazidan bosh homiy logotipi joy olgan.

Sport kiyimining shorti va getri qismlari ham umumiy dizaynga hamohang tarzda to'q ko'k rangda tayyorlangan. Shortining old qismida o'yinchi raqami va brend logotipi oq rangda yorqin ajralib turadi. Getrilardagi "Adidas"ga xos ananaviy uchta oq chiziq esa formaning umumiy koncepciyasini mantiqiy yakunlagan.

Shuningdek, poytaxtliklar ikkinchi libosini ham namoyish etdi. Ushbu to'plam ham jamoaning yangi koncepciyasiga sodiq qolgan holda, klassik va minimalistik echimlar asosida yaratilgan.

Ikkinchi libosning asosiy foni sifatida toza oq rang tanlangan. Uning ustidan tushirilgan ingichka qora vertikal chiziqlar formaga o'ziga xos salobat va retro-uslubni baxsh etadi. Dizaynni yanada boyitish maqsadida yoqa va eng uchlariga qora rangli hoshiyalar qo'shilgan bo'lib, bu oq fon bilan ajoyib kontrast hosil qilgan.

Futbolkaning yuqori qismida joylashuv geometriyasi asosiy libosdagidek saqlab qolingan: o'ng tomonda texnik hamkor "Adidas" kompaniyasining qora rangli yangi logotipi, chap tomonda esa "Paxtakor" klubining ananaviy emblemasi joy olgan. Ko'krak qismining yuqori markazida O'zbekiston davlat bayrog'i o'rin olgan bo'lsa, uning pastrog'ida jamoaning bosh homiysi logotipi yorqin qizil rangda tushirilgan. Bundan tashqari, eng qismlarida musobaqalarning maxsus shevronlari joylashtirilganini ko'rish mumkin.

Sport kiyimining shorti qismi ham umumiy ansamblga mos tarzda to'liq oq rangda ishlab chiqilgan bo'lib, undagi futbolchi raqami va brend logotipi qora rangda yorqin hamda tushunarli tarzda aks etgan.

"Paxtakor"ning yangi mavsumdagi libosi qanday ko'rinishda bo'ladi?