Ochig'i, Evropa chempionlar ligasining kuchli jamoalari o'rtasidagi o'yinni bevosita stadiondan turib tomosha qilish xayolimga ham kelmagandi.

Umuman, kunlarning birida Urganch shahridagi “To'maris–Nur” gipermarketiga xarid uchun kirdim. Uning foyesida ikkita yigit “Pepsi” kompaniyasi tomonidan tashkil etilgan “UEFA chempionlar ligasiga chiptalar yuting” akciyasi o'ynalayotganini, buning uchun bor yo'g'i uch dona 1,5 litr sig'imli “Pepsi” ichimligi sotib olib, uning chekini ularga topshirishimni, buning evaziga raqamlangan chipta taqdim etishlarini va belgilangan muddatda Evropa chempionlar ligasi uchrashuvlariga yutuq sifatida yo'llanmalar o'ynalishi haqida malumot berishdi.

O'zim futbolga qiziqmaymanmi, darhol tegishli salqin ichimlikni sotib olib, chekini ularga berdim. O'z navbatida yigitlar mening ism-familiyamni, yoshim va telefon raqamimni so'rab, chiptaning bir tomonini to'ldirishdi, ikkinchi qismini menga berishdi. Oradan bir haftadan oshiq vaqt o'tdi. Bir kuni telefonimga SMS xabari keldi. Unda 14 noyabr kuni soat 14:15 da “Sport” telekanalida jonli efirda to'g'ridan-to'g'ri UEFA chempionlar ligasiga 50 ta yo'llanma o'ynalishi yozilgandi. Shu kunni intiqib kutdim. Nihoyat, ko'rsatuv boshlandi. Mazkur akciya asosan, Farg'ona, Samarqand, Buxoro, Urganch, Namangan va Andijon shaharlarida o'tkazilgan ekan. Taniqli hakamimiz Ravshan Ermatov va iqtidorli futbolchimiz Jamshid Iskandarovlar birin-ketin omadli yo'llanma egalarini aniqlab berishdi. Natijada, 36 nafar hamyurtimiz Sankt-Peterburg shahrida bo'lib o'tgan “Zenit”– “Valensiya” uchrashuviga, 8 nafari Borisov shahrida “BATE” – “Bayer” o'yiniga, 6 nafari esa CSKA – “Volfsburg” jamoalari o'rtasida kechgan juda ahamiyatli bahsni bevosita stadionda tomosha qilish imkoniyatini ega bo'lishdi. Jumladan, menga 25 noyabr kuni Moskva viloyatining Ximki shahridagi “Arena Ximki” stadionida o'tkazilgan Rossiyaning CSKA va Germaniyaning “Volfsburg” jamoalari bellashuvini ko'rish nasib etdi.

Etiborlisi shundaki, tashkilotchilar akciya g'oliblarini Toshkentdan belgilangan shaharlarga samolyotda borib-kelishini, bir kunlik mehmonxona xarajatini to'lab berishdi. O'yinga ham bepul chipta taqdim etishdi.

Albatta, bunday imkoniyatga ega bo'lganimdan juda xursandman. Umrimda ilk bor Evropaning nomdor jamoalari o'rtasidagi o'yinni stadiondan kuzatib, rosa zavqlandim. Bunday yutuq boshqa hamyurtlarimga ham nasib etishini tilab qolaman.

Ikrom XUDOYBERGANOV, Urganch.

Pepsi tuhfasi – “Arena Ximki”ga safar