"Udineze" - "Inter"

"Kichik zebralar" bu mavsum yaxshi o'yin ko'rsatishmoqda. Jamoa anchadan buyon 6 turdan keyin 4-o'rinda bo'lmagandi. "Inter"ga qarshi bahsda Biyol va Masina klubiga yordam berolmaydi, biroq hujum etakchilari ajoyib formada. Simone Indzagida ham muammolar bor: Lukaku hamon jarohatini davolash bilan band, Chalxanoglu esa kuni-kecha mashg'ulotda kichik jarohat oldi. Shuning uchun, asosiy tarkibda yana Mxitaryanni ko'rsak kerak. Himoya markazida Stefan De Vrey o'rniga yana Acherbi tushirilishi kutilmoqda.

Bu jamoalar so'nggi bor to'qnash kelganida "Inter" ushbu stadionda 2:1 hisobida zafar quchgan. Bu safar ham aynan milanliklar favorit hisoblanadi. Biroq "Udineze" osonlikcha taslim bo'ladiganlardan emas va "qora-ko'klar"ga oson bo'lmaydi. Jamoa hatto jadvalda vice-chempiondan yuqoriroqda turibdi.

"Monca" - "Yuventus"

"Monca" bosh murabbiyini vazifasidan ozod etdi, shunday ekan, vaqtincha Rafaele Palladino jamoani boshqarib turadi. Qayd etish zarur, Palladino bungacha bosh murabbiy sifatida hech qaerda ishlamagan. Taxminlarga ko'ra, u tarkibda bazi o'zgartirishlarga qo'l uradi. Jumladan, Kaprariga hujumda Gyutker yordam beradi.

Allegrining ko'chasida ham xursandchilik deb bo'lmaydi. O'zi shundoq ham kam bo'lmagan jarohatlanganlar qatoriga Aleks Sandro ham qo'shilgani etmagandek, murabbiy o'tgan turda qizil kartochka olgan Milik va Kuadrado xizmatlaridan ham foydalana olmaydi. Jamoa muxlislari biroz bo'lsa-da, quvonchiga sabab Anxel Di Mariya safga qaytgan, ammo hozircha zaxiradan o'yinga qo'shilsa kerak.

Jamoalar o'tgan yili Silvio Berluskoni homiyligida o'tgan musobaqada ro'baro kelishgan. O'shanda "Yuventus" 2:1 hisobida zafar quchgan. Mutaxassislar "keksa sinora"ni favorit deb hisoblasa ham, oson bo'lmasligini taxmin qilmoqda.

"Roma" - "Atalanta"

Evropa Ligasi o'yinida Mourino etakchilarga dam berdi. Shunday ekan, hujumda Dibala-Abraxam juftligi tarkibga qaytishi kerak. Shuningdek, "Roma" 3 nafar markaziy himoyachi bilan o'yinni boshlasa kerak. "Atalanta" hujumida esa yangi futbolchilarni ko'rishimiz ehtimoli yuqori. Sapata jarohatlangan, Muriel va Boga esa yaxshi sport formasida emas. Shu sababli, hujumning oldingi chizig'ida Ederson ko'magidagi Lukman va Xoylundni ko'rsangiz xayron bo'lmang. Himoyada ham Gasperinining muammolari etarlicha. Vaziyatdan kelib chiqib, Jan Pero yosh Okolini maydonga tushirsa kerak.

Jamoalarning o'zaro o'yinida "Roma" kichik (1:0) hisobda zafar quchgan. "Jalorossi" bo'lajak bahsning ham favoriti sifatida ko'rilmoqda. "Atalanta" mavsumni zo'r boshladi va 1-o'rinda ketmoqda. Biroq jarohatlar jamoa muxlislarini tashvishga solayotgani turgan gap. "Roma"ning taqvimi tig'iz bo'lsa ham bergamoliklarga oson bo'lmasligi tayin.

"Milan" - "Napoli"

Pioli o'tgan uchrashuvda qizil kartochka olgan hujum etakchisi Rafael Leaoning o'rniga kimni maydonga tushirish haqida obdon o'ylab ko'rishi lozim. Shuningdek, Origi, Rebich va Krunich ham jamoasiga yordam berolmaydi. Katta ehtimol Jiruga hujumda De Kattelare va Salemarkis qo'shilishi mumkin. Markazda Benasser va Tomorini ko'ramiz. Spaletti yangi o'yinchilar jamoaga moslashib, samarali harakat qilayotganidan xursand bo'lmay iloji yo'q. Osimxen va Lozano jarohat olgan, ammo ularning o'rnini Simeone va Raspadori egallab, o'zini ko'rsatishga urinib ko'rishadi. Chempionlar Ligasida ajoyib o'yin ko'rsatgan Ndombele esa asosiy tarkibdagi o'rinni Lobotkaga bo'shatib beradi.

"Rossoneri" o'tgan gal mehmonda "Napoli"dan g'alabani tortib olgandi (1:0). Bu safar ham "Milan" favorit sanalmoqda. Ha, albatta, Chempionlar Ligasi o'yinlaridan keyin o'ziga kelib olish oson emas, qolaversa, "Napoli" bu gal ham mehmonda o'ynaydi.

"Fiorentina" - "Verona"

Bu mavsum "fialkalar"ning omadi chopmoqda. Italyano uchun katta muammo himoya chizig'i bo'ladi. Sababi Igor avvalgi bahsda qizil kartochka olgan, Milenkovich esa jarohatlangan. Bunday vaziyatda Raneri maydonga tushadi. Niklas Gonsales o'ynashi so'roq ostida. Hujumda Yovichga yordamga shay turgan Sottil va Kuameni ko'ramiz. "Verona" tarkibida katta o'zgarishlar bo'lmaydi, lekin jarohat olgan Chekkerinining o'rniga Gyunter harakatlanadi.

O'tgan o'zaro bahsda durang qayd etilgan (1:1). Bu uchrashuvda "fialkalar" ustunroqdek, chunki ular uyda o'ynaydi. Biroq nazarimizda, "Verona"ning imkoniyatlarini ham past baholamaslik kerak.

Sergey Rumyancev

Peshqadamlar bahsi: A Seriya 7-tur prevyusi