Коронавирус пандемияси тобора авж олаётгани боис буёғига ўйинлар марказлашган ҳолда давом эттирилади. Бунинг натижасида 3 августдан 15 августгача (9 август, якшанбани ҳисобга олмаганда) 12 кунда 28та ўйин бўлиб ўтади.

ПФЛ тур ўйинларини катта эҳтимол билан "Бунёдкор", "Локомотив", "Пахтакор", АГМК ва "Металлург" стадионларида ўтказади, фақат ҳозирча қайси ўйин қаерда бўлиб ўтиши айтилмаган.

Маълумки, ПФЛ ўйинлар бошланиш вақтини ҳар доим турдан турга айтиб келган. Лекин энди марказлашган ҳолда ўтказилиши боис мана шу 4та турдаги барча учрашувларнинг бошланиш вақти ва энг муҳими қайси стадионда бўлиб ўтишини бир пайтда эълон қилишига тўғри келади.

Негаки бу ўринда турдан турга эълон қилиш учун вақт йўқ. Қолаверса клублар кейинги 4та ўйиннинг қаерда ва соат нечада бошланишига қараб қисқа вақт ичида шунга кўра ҳозирлик кўришади. Шунингдек, бу томондан ПФЛнинг ўзига ҳам қулай бўлади.

Учрашув расмийлар турдан турга эълон қилиб борилгани маъқул, бу этикага ҳам тўғри келади. Аммо клублар қайси стадионда ўйнашини вақтлироқ билгани маъқул деб ўйлаймиз.

P.S. Бу ўринда яна бир масала борки, U-21 мусобақасининг ҳам навбатдаги 4 тури учун ўйинлар бўладиган стадионларни вақтли айтишга тўғри келади.

ПФЛ қолган 4та турнинг барча стадионлари ва бошланиш вақтини бир пайтда эълон қилиши керак