Men PFLga iloji boricha neytral munosabatda bo'lishga harakat qilaman: kerak bo'lsa – maqtayman, kerak bo'lsa – konstruktiv tanqid qilaman.

2025 yilgi mavsumdan boshlab, PFL WyScout malumotlari asosida ilg'or statistika elon qila boshladi. Bu uchun ularga "layk", lekin raqamlar o'zidan o'zi ko'p narsani anglatmaydi. Bir necha misol:

1. Futbolchilarning zarbalari bo'yicha statistika.

Norchaev va Xojimirzaev olti martadan zarba berdi. Nima bo'pti?

Har qanday ishda, jumladan futbol statistikasi bilan ishlashda, umumiy manzaraga etibor qaratish kerak. Hamroh ko'rsatkichlar bilan birga. Zarba bo'yicha – darvoza tomon yo'llangan zarbalar va kutilayotgan gollar (xG) muhim. Xojimirzaev qo'shimcha daqiqalarda Navbahorga gol urishi mumkin edi, lekin penaltini ancha noaniq tepib, imkoniyatni boy berdi.

Norchaevning 6 zarbasidan 3 tasi darvozaga aniq borib etdi, xG ko'rsatkichi – 0,74. Yani, u gol urishga yaqin edi, lekin realizaciya pand berdi (yoki So'g'diyona darvozaboni yaxshi o'ynadi – bu endi har bir zarbani alohida tahlil qilishni talab qiladi, unga esa vaqt yo'q). Xojimirzaevning esa faqat 1 ta zarbasi darvozaga aniq yo'llangan, penalti esa yuqorida aytilganidek ancha noaniq ketgan. Uning xG ko'rsatkichi – 1,05, lekin bu asosan penalti hisobiga shakllangan.

2-3. To'pga egalik qilish.

Surxonning 71,2% ko'rsatkichi, albatta, ajoyib, lekin chuqurroq qaraymiz. xG – 1,93 (yana bir bora penalti kiritilmagan) va 12 zarba, lekin shundan atigi 3 tasi aniq borgan. Natijada Surxon Qizilqumga yutqazdi. Bu jamoa esa Superliga 1-turida eng kam – 28,8% vaqt davomida to'pga egalik qilgan edi. Shunga qaramay, Qizilqum 11 ta zarba berdi, ularning 7 tasi darvozaga aniq bordi, xG – 1,45 (hech qanday penaltilarsiz).

Paslar soni esa farq qiladi: Surxon – 603, Qizilqum – 226. Uzoq paslarning ulushi Surxonda 7,6%, Qizilqumda esa 25,6%.

Bu nimani anglatadi? Qizilqum chuqur himoyalanib, qarshi hujumlarga juda yaxshi o'tgan. Surxon esa ko'proq to'pni nazorat qilgan, lekin ko'p hujumlar unchalik keskin bo'lmagan. Umuman olganda, grafikada berilgan 5 ta klub orasida 1-turda faqat OKMK g'alaba qozondi. Bu bizning liganing o'yin uslubi haqida ko'p narsani anglatadi. Himoyaga o'ralashib, qarshi hujumga o'tish – samaraliroq. O'tgan yili Andijon 52 ta gol urdi, xG esa bor-yo'g'i 29,8 edi. Bu – juda katta overperforming (jamoaning o'yinga qaraganda ko'proq gol urishi va ochko yig'ishini ifodalovchi tushuncha).

4. Jamoalarning zarbalari birinchi grafikadagi holatga o'xshash.

Navbahor 17 ta zarba berdi, lekin atigi 4 tasi darvozaga to'g'ri bordi. xG – 0,82. Dinamo esa 14 ta zarba yo'lladi, ulardan 7 tasi darvozaga aniq yo'llandi, xG – 1,89. Penalti hisobga olinmagan taqdirda ham, bu ko'rsatkich samarqandliklar uchun Navbahornikidan yuqoriroq.

Alohida olingan statistika hech narsani anglatmaydi. Hammasini kompleks ko'rib chiqish kerak. PFL buni nega qilmayapti – bilmayman.

Nikolay Egorichev

PFL statistik ko'rsatkichlarni kompleks ko'rib chiqishi kerak