Сўровнома "Сизнингча, ПФЛ янги раҳбари ким бўлиши керак?" мавзусида бўлиб, олтита вариантни келтиргандик. Бугун сўровнома якунларини эълон қиламиз.

Сўровномада тўрт кун ичида 21 мингдан зиёд ўқувчи ўзига маъқул келган вариантни танлаган. Энг кўп овозни Улуғбек Мирзаев тўплади. Сўровнома иштирокчиларининг 51 фоизи, яъни 10,905 киши айнан Улуғбек Мирзаев ПФЛ раҳбари бўлиши керак вариантини белгилаган. Маълумки, Улуғбек Абдусатторович бунгача "Бунёдкор" футбол клуби бош директори лавозимида ишлаб келаётганди.

"Диёрни қайтариш керак" деган вариант 19 фоиз овоз билан иккинчи бўлди. 3,968 мухлис айнан Диёрнинг ўзи маъқул деган вариантда тўхталган. Бизга маълум бўлишича, Диёр Имомхўжаев ҳозирги кунда ҳам ПФЛ бош директори вазифасини бажарувчи сифатида ишлаб келяпти.

Бугунги кунда Қатарда фаолият олиб бораётган таниқли мутахассис Алишер Никимбаев 16 фоиз овоз билан учинчи бўлди. Алишер Файзуллаевичга 3,359 мухлис овоз берган. Лекин Никимбаевнинг Ўзбекистонга қайтиб ПФЛ бош директори бўлиши амалга ошиши жуда қийин иш бўлса керак деган тахминдамиз.

9 фоиз иштирокчи, яъни 2,026 мухлис эса "Европадан мутахассис керак" деган вариантни белгилашган. Ким билади дейсиз, балки бизга ҳам худди Қатардаги каби ПФЛни хорижлик кучли мутахассис бошқариши керакмикин...

Сўровномада кейинги, яъни тўртинчи ўринни олган ПФЛ собиқ раҳбари Фарҳод Магометов бўлди. Магометов 640 овоз билан 3 фоизлик кўрсаткич қайд этди. Ва ниҳоят 2 фоиз билан охирги ўринни Мурод Алиев эгаллади. Маълумки, Мурод Алиев бугунги кунда АГМК футбол клубида фаолият олиб боряпти. Ушбу мутахассиснинг ҳам номзоди илгари сурилганди, бироқ нимадир бўлиб иш тўхтаб қолди. Мурод Боқиевич 418та овоз тўплади.

P.S. ПФЛ раҳбариятида ўзгариш бўладими? Ҳозирча бир нарса дейиш қийин, Фақат эшитганимиз шуки, шу ой ўрталарида ПФЛ бош директори лавозимига сайлов бўлиши кутиляпти ва янги раҳбарни клублар сайлар экан.

ПФЛ янги раҳбари ким бўлиши керак? (Сўровнома якунлари)