To'g'rida, Jahonga tanilgan mana-man degan braziliyalik futbolchi yoshligidan, bolaligidan qumli maydonda to'p tepib katta bo'lganini, mashhurlikka erishganida ham plyaj futbolida kamol topganini ko'p xotirlaydi. Bunday xolatni bilamiz, eshitganmiz-u, lekin vaqti kelib o'zimizda ham futbolning bu ko'rinishi paydo bo'lishiga, ommalashishiga ishongimiz kelmas edi. Bundan o'n yillarcha oldin O'zbekistonda ham plyaj futboli bo'yicha rasmiy musobaqa o'tkazishga kirishildi. Plyaj futboliga joy masalasida Qarshi shahrida yangi tamirdan chiqqan va Viloyat bolalar va ayollar sport markaziga aylantirilgan sobiq “Geolog” stadionining bir burchagi tanlandi. Tezlikda ish boshlandi: tonna-tonna ahlatlar tashqariga olib chiqildi, yuzlab yuk mashinalarda qum keltirildi, tomoshabinlar uchun o'rindiqlar, hakamlar va futbolchilar uchun echinib-kiyinish xonalari barpo etildi. Qarabsizki, xorijnikidan qolishmaydigan binoyidek plyaj maydoni paydo bo'ldi.

Erkaklar va ayollar o'rtasida mamlakat chempionati va Kubok o'yinlari o'tkazila boshlandi. Har ikkalasida ham o'nga yaqin jamoalar ishtirok etar, g'oliblik aksariyat mavsumlarda mezbonlarning o'zlariga nasib qilardi. Hatto plyaj futboli bo'yicha ikki yilda bir o'tkaziladigan Jahon chempionati saralash o'yinlariga saralab olingan O'zbekiston terma jamoasi azolari ham aynan shu maydonda, aynan chempionat va Kubok o'yinlarida toblanardi.

Nima bo'ldi-yu, musobaqalarga “ko'z tegdi”. 2012 yilda avvaliga erkaklar o'rtasidagi turnirlar barham topdi, bir yil o'tib esa ayollar musobaqalari ham tappa-taq to'xtadi. Orada salkam besh yil o'tibdi. O'zbekiston futbol associaciyasidagi islohotlar sabab mazkur sport o'yin yana tiklanmoqda, yana rasmiy musobaqalar o'tkazilishi yo'lga qo'yilmoqda.

16-21 iyul kunlari O'zbekistondagi yagona plyaj maydoni – Qarshidagi “Geolog” sport majmuasi plyaj maydonida erkaklar o'rtasida O'zbekiston Kubogi musobaqasi tashkillashtirilishi rejalashtirildi. Bu borada O'zPFL Sport boshqarmasi mutaxassislari tomonidan musobaqa qonun-qoidalari qaytadan ishlab chiqildi va hududlarga taklifnomalar yuborildi. Bir paytlar mazkur musobaqalarda “MVM”, “Haloskor”, “SHGXK” (Qarshi), “Orzu”, “Koson-yog'” ( (Koson), “Bodomzor” (Toshkent), “So'g'diyona” (Samarqand), “Olimpiya” (Termiz), “Lokomotiv” (Navoiy), “Kogon” (Buxoro), “Sho'rtan” (G'uzor), “Lochin-To'y-Tepa” (Toshkent viloyati) kabi jamoalar o'z shahar va viloyati sharafini himoya qilishar edi. Endichi, ko'ramiz, kimlar maydonda saf tortishadi?

Plyaj futboli: Rasmiy musobaqa yana davom ettiriladi