Ikkinchi davrani omadsiz boshlagan “Dinamo” jamoasi safarda Mirjalol Qosimov boshchiligidagi AGMK klubiga qarshi saf tortadi.

Superliga. 19-tur.
14 sentyabr (shanba)
AGMK – “DINAMO”
Hakamlar: Jasur Muxtorov, Baxtiyorxo'ja Shavkatov, Rishat Nugmanov, Ravshan Abdivohidov
O'yin boshlanish vaqti: 18:30

Joriy mavsumda…
Ikkinchi davraning so'nggi beshta turida muvaffaqiyatsiz natija qayd etgan “Dinamo” jamoasi ayni damda 18 ochko bilan 9-o'rinni band etib turgan bo'lsa, AGMK 2-davrada 1 g'alaba, 1 durang, 3 mag'lubiyat qayd etgan holda 16 ochko bilan 12-o'rinda bormoqda. Bu o'yindagi g'alaba ikki tomon uchun ham juda zarur. AGMK may oyidan buyon uyida yutolmayapti, "Dinamo" esa bu mavsum safarda g'alaba nimaligini bilmayapti.

Eski tanishlar…
O'z vaqtida Dinamoda to'p surgan va hozirda AGMK tarkibida to'p surayotgan futbolchilar talaygina. Xususan, AGMK yarimhimoyachisi Dilshod Jo'raev Oliy Ligadagi debyutini 2012 yilda aynan Dinamo safida amalga oshirgandi. Hujumchi Shahzodbek Nurmatov ham Oliy Ligadagi ilk o'yinlarini aynan “Dinamo” safida 2011 yilda o'tkazgan edi. Qolaversa, olmaliqliklar to'purari Zafar Polvonov 2012 yilda, yarimhimoyachi Sanat Shixov esa 2013-14 yillarda “Dinamo”dagi o'yinlari bilan samarqandlik muxlislar etiboriga tushgan. Shuningdek, AGMK darvozabonlari Suhrob Sultonov va Roman Abdulovlar ham faoliyatidagi ilk o'yinlarini “Dinamo” safida o'tkazgan edi. Qolaversa, AGMK safiga qo'shilgan samarqandlik futbolchi Erkin Boydullaev ham aynan “Dinamo”dagi o'yinlari bilan muxlislarga tanilgan.

“Dinamo” safidan esa birgina Qadamboy Nurmetov oz muddat AGMK safida to'p surgan.

O'zaro o'yinlar: Ustunlik kimda?
Dinamo jamoasi Oliy Liga doirasida ushbu jamoaga qarshi 19 marta to'qnash kelgan. Ushbu bahslarning 7 tasida Dinamo g'alaba nashidasini surgan bo'lsa, 8 ta o'yin Konchilarning g'alabasi bilan tugagan. 4 ta uchrashuvda esa jamoalar murosa yo'lini tanlashgan.

O'zaro o'yinlardagi gollar nisbati 20:24 ko'rinishida, olmaliqliklar foydasiga. Bahslar davomida AGMK 28, Dinamo 25 ochkoni qo'lga kiritgan. Dinamoning o'zaro o'yinlarda qozongan eng yirik g'alabasi – 4:2 ga teng. AGMKning eng yirik g'alabasi esa 3:1 natijasidir. Jamoalarning o'zaro so'nggi uchrashuvlarida “Dinamo” 1-davrada Shohruh Abdurahmonovning yagona goli evaziga AGMKni Samarqandda mag'lub etgandi.

O'zaro so'nggi uchrashuvlar:
11.05.2019 Dinamo - AGMK 1:0

13.10.2017 Dinamo - AGMK 1:0
06.05.2017 AGMK - Dinamo 2:0

31.10.2015 Dinamo - Olmaliq 1:1
01.07.2015 Olmaliq - Dinamo 3:0

02.10.2014 Dinamo - Olmaliq 2:1
21.05.2014 Olmaliq - Dinamo 3:0

30.03.2013 Dinamo - Olmaliq 0:0
23.10.2013 Olmaliq - Dinamo 3:2

09.08.2012 Dinamo - Olmaliq 0:1
25.06.2012 Olmaliq - Dinamo 1:2

10.06.2011 Dinamo - Olmaliq 0:1
13.08.2011 Olmaliq - Dinamo 1:1

05.08.2010 Olmaliq - Dinamo 3:1
05.06.2010 Dinamo - Olmaliq 4:2.

Fakt:
AGMK jamoasi so'nggi marta o'z uyida 5 may kuni 7-tur doirasida “Surxon” jamoasini 2:0 hisobida mag'lub eta olgan. O'sha o'yinda uchrashuvni Jasur Muxtorov boshqargan. O'shandan buyon Olmaliq klubi Olmaliqda g'alaba qozona olmayapti.
AGMK – Dinamo uchrashuvi bosh hakami Jasur Muxtorov bungacha 2019 yilgi mavsumda AGMK ishtirokidagi ikkita uchrashuvda ishlagan. Ushbu ikki bahsda AGMK Olmaliqda “Surxon”ni 2:0 hisobida, safarda “Andijon”ni 1:2 hisobida mag'lub etgan. Umuman olganda AGMK 2019 yilgi chempionatda 4 ta g'alabaga erishgan va buning teng yarmi – 2 tasi aynan Jasur Muxtorov boshqargan uchrashuvlarda erishilgan.

Jasur Muxtorov 2019 yilgi mavsumda “Dinamo” ishtirokidagi uchrashuvlarda ham ishlagan. O'sha o'yinlarda “Dinamo” safarda “Paxtakor”ga mag'lub bo'lgan (2:0), “Buxoro” bilan esa 0:0 o'ynagan.

Dinamo klubi matbuot xizmati.

Prevyu: AGMK 4 oydan buyon uyida yutolmayapti, Dinamo safarda g'olib bo'lmagan. Kim noxush ananani buzadi?