Bugungi o'yin favoriti Kolumbiya bo'lsa ajab emas. Kolumbiya terma jamoasi Pekerman qo'l ostida Janubiy Amerika mintaqasida Argentinadan keyin ikkinchi bo'ldi. Jamoaning bir qator futbolchilari kuchli beshlik chempionatida ishtirok etadilar. Kristian Sapata, Mario Yepes, Xuan Suniga, Xuan Kuadrado va Freddi Guarin Italiya "A-Seriyasi"ning etakchi futbolchilari sifatida etirof etiladi. Terma jamoaning uchinchi posboni Farid Mondragon bundan 20 yil avval AQSHda bo'lib o'tgan mundialda ham ishtirok etgan. Ammo 42 yoshli posbonga maydonga tushish nasib etmagan. Shundan keyin u 1998 yilgi JCHda qatnashgan. Bu uning hisobidagi uchinchi jahon chempionati. Terma jamoa bosh murabbiyi Xose Pakermanni ortiqcha tanishtirib o'tirishga hojat bo'lmasa kerak. U 2004-06 yillarda Argentina terma jamoasiga ustozlik qilgan.

Greciya doimo sirli jamoa bo'lib kelgan. Bir o'ynasa o'yini chiqadi. Ammo himoyadan harakat qilishni kanda qilmaydi. Shu boisdan bo'lsa kerak, Greciya terma jamoasi ishtirokidagi o'yinlar doim ham qiziq bo'lmagan. Saralash bahslarida Greciyaga omad kulib boqadi. Bosniya va Gercogovina, Slovakiya, Litva, Latviya hamda Lixtenshteyn terma jamoalari bilan bir guruhdan olgan greklar bosniyaliklar bilan 25 ochkodan to'playdi.

Terma jamoaning hujum chizig'ida biroz muammo bor. Shu boisdan ham 32 yoshni qarshi olgan ikki hujumchi Salpingidis va Gekaslar JCH ro'yxatidan o'tdilar. Fernandu Santushning ishongan tog'i Yorgos Karagunis. "Fulxem" yarim himoyachisi bugun terma jamoasini sardor sifatida maydonga olib tushadi.

Bu ikki terma jamoa shu kungacha bir marotaba o'zaro to'qnash kelganlar. 1994 yilgi JCHdan avval AQSHda o'rtoqlik uchrashuvi bo'lib o'tadi. O'shanda greklar 2:0 hisobda imkoniyatni boy bergan edilar.

Balki boshqa terma jamoalarga bilinmas, ammo Radamel Falkaoning jarohati Kolumbiya uchun jiddiy bosh og'riq bo'ldi. Bu masalani Pakerman "River Playt" hujumchisi Teofilo Guterres bilan echdi. Hujumdagi muammo Greciyada ham bor. "Fulxem"ga o'tgan Kostas Mitroglu asosiy vaqtini zaxira o'rindig'ida o'tkazib, JCHga deyarli o'yin amaliyotisiz keldi.

Guarin esa saralash o'yinining so'nggi turida qizil kartochka olganligi uchun bugun maydonda Kolumbiyaga yordam bera olmaydi.

14 iyun. 21:00
Bosh hakam: Mark Geiger (AQSH)
Yordamchi hakamlar: Mark Sin Xurd (AQSH), Joy Fletcher (Kanada)
Zaxira hakami: Alirizo Fag'oni (Eron)

Taxminiy tarkiblar:
Kolumbiya: Ospina, Suniga, Yepes, Sapata, Armero, Rodriges, Agilar, Sanches, Kuadrado, Guterres, Martines.
Greciya: Karnezis, Torosidis, Papastatopulos, Manolas, Xolebas, Karagunis, Maniatis, Ciolis, Salpingidis, Samaras, Mitroglu.

Nodirxo'ja Yuldashev.

Prevyu: Kolumbiya - Greciya. Falkaosiz qolgan janub