Chempionlar ligasi doirasida o'z maydonida "Manchester Yunayted"ga yutqazib qo'ygan "Yuventus", Italiya A seriyasida oxirgi uchta o'yinning barchasida g'alabaga erishgan "Milan" mehmoni bo'ladi.

Bugungi kunda bu ikki klubning natijalari teng deb bo'lmaydi, lekin o'zaro o'yindagi shiddat hech qaerga yo'qolgani yo'q.

Bu mavsum Italiya A seriyasida "Yuventus" ishonch bilan peshqadamlik qilmoqda. Turin klubi 11ta o'yinning 10tasida g'alaba qozongan va bir bor durang o'ynagan. Etiborlisi yangi mavsumda Allegri shogirdlari chempionatda safarda 5ta o'yin o'tkazib 5ta g'alabaga erishishdi.

"Milan" esa kayfiyat jamoasiga aylanib qolganiga ancha bo'lgan. Gattuzo shogirdlari istashsa kuchli raqibga jiddiy qarshilik ko'rsata olishadi, istashsa autsayderga qarshi bahsda osongina yutqazib qo'yishadi. "Rossonerlar" bu mavsum o'z maydonlarida hozirga qadar yutqazishmadi: 4ta g'alaba, 1 durang.

Qiziqarli faktlar:

- Bu ikki jamoa Italiya chempionatida o'zaro 178ta o'yin o'tkazishgan: 69ta uchrashuvda "Yuventus", 51ta o'yinda "Milan" g'alaba qozongan. Qolgan 58ta bahsda durang qayd etilgan. v

"Milan" mezbonligida o'tgan 89ta bahsning 29tasida "rossonerlar" zafar quchishgan. 24 bor "byankonerilar" safardan uch ochko bilan qaytishgan. 36ta uchrashuvda g'olibni aniqlashning imkoni bo'lmagan.

- Oxirgi beshta o'yinning barchasida "Yuventus"ning qo'li baland kelgan: uch marta A Seriya va ikki marta Italiya Kubogi doirasida. Bu o'yinlar orasida o'tgan mavsum Italiya kubogi finali ham bor - 4:0.

- "Milan"ning chempionatda "Yuventus" ustidan qozongan eng so'nggi g'alabasi 2016 yil 22 oktyabr kuni qo'lga kiritilgan – 1:0. Yagona golni Manuel Lokatelli o'z hisobiga yozib qo'ygandi.

- "Yuventus" chorshanba kuni bu mavsumdagi birinchi mag'lubiyatini "Manchester Yunayted"dan qabul qilib oldi (1:2).

- "Milan" o'tgan hafta oxirida bu mavsum A Seriyadagi birinchi "quruq o'yini"ni o'tkazdi (1:0 "Udineze").

- Krishtianu Ronaldu hech qachon "San-Siro" ("Juzeppe Meacca") stadionida gol urmagan. Portugaliyalik futbolchi mazkur stadionda besh marta (uch bor "Milan"ga qarshi, bir marta "Inter"ga qarshi va 2016 yilgi ECHL finalida "Atletiko"ga qarshi) maydonga tushgan. Bundan tashqari uning jamoalari bu stadionda hech qachon asosiy vaqtda g'alaba qozona olishmagan.

- O'tgan mavsum "Milan"da o'ynagan Leonardo Bonuchchi hozir "Yuventus"da, oldingi mavsum "Yuventus"da to'p tepgan Gonsalo Iguain "Milan"da o'ynamoqda.

MILAN - YUVENTUS
11 noyabr. Milan. "Juzeppe Meacca" stadioni. 00:30.
Bosh hakam - Paolo Maccoleni (Bergamo).

Taxminiy tarkiblar

"Milan": Donnarumma, Kalabria, Zapata, Ronmanoli, Rodriges, Kessie, Bakayoko, Laksalt, Suso, Kutrone, Kastilexo

"Yuventus": Shchesni, Kanselu, Bonuchchi, Kellini, Sandro, Xedira, Pyanich, Matyuidi, Dibala, Mandjukich, Ronaldu

BOSH MURABBIYLAR NIMA DEYDI?

Jennaro Gattuzo "Milan" ustozi:

"Yuventus" tarkibi chempionlar bilan to'la, ular xuddi o'zga sayoradan kelishgandek. "Barselona" bilan birga ular Evropaning eng kuchli jamoasi. Krishtianu Ronaldu jamoaga kelib g'oliblik ruhiyatini qo'shdi. Shunga qaramay biz maydonga boshimizni tik ko'targan holda tushamiz: futbolda istalgan narsa bo'lishi mumkin.

Allegri mening ustozim bo'lgan, hamon u bilan gaplashib turamiz. Maks ko'p bor tarkibni va taktikani o'zgartiradi".

Massimiliano Allegri "Yuventus" usozi:

"Biz o'yin taqdirini 90-daqiqaga qadar hal qilmayapmiz va katta tavakkal qilayapmiz. Chorshanba kuni "Manchester Yunayted"ga qarshi o'yinda vaziyatni tushunish etishmadi. Biz faqat ikki xil uslubda gol o'tkazayapmiz: standartlardan yoki "uxlab qolayapmiz". Mag'lub bo'lmaydigan jamoa yo'q. San-Siro"da bizni ajoyib o'yin kutmoqda".

Prevyu. "Milan" - "Yuventus"