Қаршининг "Насаф" клуби бугун Тошкентда "Локомотив"га қарши майдонга чиқади. Қуйида эса ўйиндан олдинги қизиқарли маълумот ва фактларни келтириб ўтамиз.

Ўзаро ўйинлар

Ушбу жамоалар Суперлигада жами 34 бор тўқнаш келишган. Ғалабалардаги тафовутни оладиган бўлсак, кичик устунлик "Насаф" томонида эканлигини кўришимиз мумкин, 15та ғалаба. "Локомотив" рақиби устидан 13 бор зафар қучган. 6та баҳсда томонлар муроса кўчасини танлашган. Тўплар нисбати 45:38, "аждарлар" фойдасига. Бугун мезбон мақомидаги "темирйўлчилар" ўз майдонларида "Насаф"га 5 бор мағлуб бўлишган. Мезбонлар Тошкентда кечган сўнгги 10та ўйиннинг 2тасида енгилган. Энг йирик ҳисоб 2020 йилги мавсумда қайд этилган бўлиб, "Жар"да кечган баҳсда Рўзиқул Бердиев шогирдлари 4:0 ҳисобидаги ғалабани ўзиники қилган эди.

"Насаф" учун ОЧЛдан олдин сўнгги репетитция

Қарши клуби бугунги ўйин якунлангач 4 аперль куни ОЧЛда иштирок этиш учун тўғри Саудия Арабистонига йўл олади. Қайсидир маънода бугунги баҳс Рўзиқул Бердиевга футболчиларни кўриб олиш, тайёргарликни тешириб олиш учун яхши имконият. Балки таркибда айрим ротатцияларни кўришимиз эҳтимоли ҳам бор. Боз устига жамоанинг кўп футболчилари терма жамоа ихтиёридан қайтишди. Эҳтимол мураббийлар штаби барча карталарни очишмас. Буни ўйин давомида билиб оламиз. "Локомотив" эса ўз майдонида ғалаба учун ўйнаши табиий. Улар аввалги турда "Бунёдкор"дан учралган мағлубият учун ҳам икки ҳисса куч билан ҳаракат қилади.

Денис Коростиченко "Насаф"ни олдин ҳам мағлуб этган

Ўтган мавсумнинг сўнгги турида Микаэль Секейра "Локомотив"ни тарк этди. "Насаф" билан ўйинга эса жамоани Денис Коростиченко олиб борди. Ўша баҳсда унинг қўл остидаги "Локомотив" Қаршидан уч очко билан қайтгани ёдимизда. Коростиченко бу ишни яна бир бор уддалайдими?

Жамоаларнинг сўнгги ўйинлари

"Қизилқум" - "Локомотив" 2:0

"Локомотив" - АГМК 2:1

"Бунёдкор" - "Локомотив" 2:1

"Навбаҳор" - "Насаф" 0:0

"Насаф" - "Металлург" 1:1

"Банияс" - "Насаф" 0:2

АГМК - "Насаф" (қолдирилган)

"Насаф"нинг учрашувга қайдномаси

"Локомотив" бугунги ўйинга қайдномани эълон қилгани йўқ.

Ҳакамлар

2 апрель, шанба
ЛОКОМОТИВ – НАСАФ
Ҳакамлар: Раҳимбек Каримов, Анвар Маражабов, Зиёдулло Абдураҳмонов, Хушнуд Суюнбоев
Назоратчи: Бахтиёр Намозов
VAR ҳаками: Аскер Нажафалиев
VAR ассистенти: Алишер Усмонов
VAR назоратчи: Владислав Цейтлин
Комиссар: Сардор Қудратуллаев
Бошланиш вақти: 18:30

Эслатиб ўтамиз рамазон ойи бошлангани муносабати билан бугун "Локомотив" стадионига ташриф буюрган мухлисларга бепул ифторлик тарқатилади.

Превью. "Насаф" учун ОЧЛдан олдин сўнгги репетиция