Bugun Superligada mag'lubiyatsiz odimlayotgan ikki jamoa "Neftchi" va "Bunyodkor" O'zbekiston kubogi guruh bosqichi doirasida Farg'onada to'qnash keladi. Taqvim bizga yana bir ajoyib o'yinni tuhfa qilmoqda. Futbolda umuman sportda shunday qoida borki, unda durang tomon bo'lmaydi. G'olib yoki mag'lub. 18:00da start oladigan bahs echimi topilmayotgan mana shu narsaga oydinlik kiritib berishi kerak. To'g'ri bu kubok, hali oldinda chempionatda ham ular yana kurashishadi. Lekin undan avval biz kim aslida kim ekanligi, haqiqiy kuchli jamoa nomini aniqlab olishimiz shart. Superliga oldidan bu xulosalarni bildirishga ham ko'maklashsa ajabmas.

"Neftchi" matbuot xizmati tomonidan chiqarilgan poster

Kuboklardagi o'zaro o'yinlar

"Neftchi"ni sovrinlar sari etaklayotgan Vitaliy Levchenko bugun tarixiy g'alabani qo'lga kiritishi mumkin. Statistika kubok uchrashuvlarida "Neftchi"ning "Bunyodkor" ustidan biror marotaba g'alaba qozona olmaganini ko'rsatmoqda. 4ta uchrashuvning barchasida "qaldirg'ochlar" muvaffaqiyatli parvozni amalga oshira olgan. Birida Yuriy Sarkisyan, ikkinchisida Vadim Abramov maydonni boshi egik holda tark etgan.

28.07.2017. "Bunyodkor" - "Neftchi" 3:1

30.06.2017. "Neftchi" - "Bunyodkor" 1:2

04.07.2010. "Bunyodkor" - "Neftchi" 4:1

30.06.2010. "Neftchi" - "Bunyodkor" 2:3

To'purarlar

Kubok bahslarida "Neftchi" darvozabonlarini eng ko'p hafa qilgan futbolchi Rivaldo hisoblanadi. 2010 yil O'zbekiston kubogi yarim finalida 2ta uchrashuvda raqibga 3ta gol urgan. Keyingi o'rinda Stevica Ristich va Anvar Berdiev, Doston Hamdamov, Muzaffar Muzaffarov 2tadan to'p kiritgan.

Rivaldo - 3

Stevica Ristich - 2

Anvar Berdiev - 2

Doston Hamdamov - 2

Muzaffar Muzaffarov - 2

Denilson - 1

Vohid Shodiev - 1

Otabek Shukurov - 1

Mirjamol Qosimov - 1

Vadim Chemirtan - 1

Superligadagi ishtirok

"Neftchi" va "Bunyodkor" turnir jadvalida 13 ochkodan to'plagan holda 1-2 o'rinlarni egallab turishibdi. Farg'onaliklar 5ta bahsda 11ta gol urgan bo'lsa, darvozasidan 3ta to'p olib chiqqan. Poytaxt klubida to'plar nisbati 9-2. "Neftchi" Superliga doirasida 7ta o'yindan beri mag'lub bo'lmayapti. Vodiyliklar so'nggi bor 2022 yilning noyabrida OKMKga imkoniyatni boy bergan. "Bunyodkor" 2018 yilgi mavsumdan beri eng yaxshi startini amalga oshirdi. O'shanda "qaldirg'ochlar" 6ta turning barchasida g'alaba qozongandi.

Nurillo To'xtasinov kubokda "Neftchi"ga yordam bera olmaydi

Bugungi qarama-qarshilik oldidan "Neftchi"da jiddi yo'qotish bor. Nurillo To'xtasinov "Andijon" bilan uchrashuvda hakam tomonidan chetlatilgan edi. Lutfulla To'raev tiklanish jarayonida. Nurillo To'xtasinovdan bu yil ajoyib ko'rsatkich 3+2. U 5ta turda "Neftchi"ning 3ta goliga mualliflik qildi va 2ta assistni amalga oshirdi.

Barchaga yoqimli tomosha tilaymiz!

PREVYU. "Neftchi" bugun tarixiy g'alabani qo'lga kiritishi mumkin