Mirjalol Qosimov boshchiligidagi AGMK Qarshida "Nasaf" mehmoni. Biz esa dastlabki finalchini aniqlab beradigan uchrashuvdan oldin ayrim malumotlarga to'xtalib o'tamiz.

KETMA-KET UCHINCHI YIL YARIM FINALDA TO'QNASHUV

Jamoalar qatorasiga uchinchi mavsumdirki, mamlakat kubogi yarim finalida to'qnash kelishmoqda. Umuman kubokda o'zaro 4 marotaba uchrashishgan. Kichik ustunlik AGMK tomonida 2ta g'alaba, 1ta bahsda "Nasaf"ning qo'li baland kelgan. AGMK o'z tarixida birinchi bor finalga chiqqan 2018 yilgi mavsumda yarim finalda aynan "ajdarlar"ni ortda qoldirgandi. Yana 1 uchrashuvda murosa ko'chasi tanlangan. Beshinchi bellashuvda omad kimga kulib boqishini oqshomda bilib olamiz.

18.03.2009. AGMK - "Nasaf" 1:1 (penaltilar seriyasida 5:6)

30.05.2018. AGMK - "Nasaf" 2:1

16.12.2020. AGMK - "Nasaf" 1:0

24.11.2021. AGMK - "Nasaf" 0:2

FINAL OSTONASIDAGI FAKTLAR

"Ajdarlar" shu kungacha 7 marotaba finalda o'ynagan. Ularning 2tasida bosh sovringa ega chiqqan bo'lsa, 5ta o'yinda imkoniyat boy berishganini aytish mumkin. Buxoro finali ular uchun AGMK to'sig'idan o'tgan taqdirda sakkizinchisi bo'ladi va "Bunyodkor"dan (9 marotaba finalda) keyin uchinchi o'ringa chiqib oladi. AGMK o'z tarixidagi to'rtinchi finalga yo'llanma olish arafasida.

JAMOALARNING CHEMPIONATDAGI YURISHI QANDAY KETYAPTI?

Ro'ziqul Berdiev shogirdlari ikkinchi davrani ko'tarinki ruhda davom ettirmoqda. Jamoa chempionlik yo'lidagi muhim uchrashuvda Toshkentda "Paxtakor"ni mag'lub eta oldi. Ayni paytda turnir jadvalida peshqadam bo'lib turgan "Nasaf"da ajoyib imkoniyat yuzaga kelgan. Buyog'i barchasi jamoaning o'z qo'lida. Qarshiliklar mavsumni 2ta kubok bilan yakunlashi mumkin.

AGMK esa sovrinli o'rinlardan biroz uzoqlashdi. "Qizilqum"dan uchralgan mag'lubiyat jamoaning imkoniyatlarini kamaytirib yubordi. Uchinchi o'rinda ketayotgan "Paxtakor" bilan oradagi farq 7 ochko. Shunday ekan olmaliqliklar endilikda bor kuchlarini O'zbekiston kubogiga sarflashlari turgan gap.

YARIM FINAL POYTAXT KLUBLARISIZ

Chorak final "Navbahor", "So'g'diyona", "Nasaf", AGMK final yo'llanmasi uchun kurash olib boradi. Ajablantirgan jihati shuki, joriy yilda musobaqa yarim finaliga birorta poytaxt klubi yo'l olgani yo'q. Bunday holat so'nggi bor 1999/2000 yilgi mavsumda kuzatilgan bo'lib, final ostonasida "Do'stlik" (Toshkent viloyati), "Neftchi" (Farg'ona), "Nasaf" (Qarshi), "Dinamo" (Samarqand) jamoalari ishtirok etgan edi. Keyingi yillarda "Traktor", "Paxtakor", "Bunyodkor", "Lokomotiv" bu bosqichdan doimiy o'rin olib kelgan.

Buxoro finali tomon kim manzilida davom etadi yoki ortga qaytadi, barchasini bilish uchun oz vaqt qoldi.

PREVYU. O'zbekiston kubogi. Beshinchi bellashuvda kimning ishi besh bo'ladi?