Европада футбол шамоли эсишни аллақачон бошлади. Аввалига Франция суперкубоги, Франция чемпионати, Германия суперкубоги ҳамда Англия суперкубок ўйинлари орқали ишқибозлар ўз чанқоқларини бироз босишга эришишганди. Бугун эса УЕФА суперкубоги орқали уларга "десерт" тақдим этилади.

Европанинг тенгсиз жамоаси бўлиб келаётган ва қаторасига икки бор ЕЧЛ бош совринини ўзини қилган "Реал" панадан чиқиб келаётган "Манчестер Юнайтед" билан мавсумнинг дастлабки соврини учун курашади.

УЕФА суперкубоги тарихига назар ташлайдиган бўлсак, ушбу кичик мусобақа 1972 йилда ташкил этилган.
Энг қизиғи, ушбу турнирни ўтказиш ғояси Нидерландия газетаси журналисти Антон Виткампдан чиққан. Ўша пайтлари Нидерландия футболи юқори чўққида бўлган ва журналист антиқа усул орқали Нидерландия клубларининг кучини синашни истаган.
"Аякс" ҳамда Йохан Кройффнинг юлдузли онлари бошланган пайтга тўғри келади.
УЕФА суперкубогининг биринчи ўйини "De Telegraaf" газетаси томонидан молиялаштирилган. Аввалига УЕФА ушбу мусобақани тан олмаган ва журналистнинг ғоясини қабул қилмаган. Илк Суперкубок учрашув расмий мақомда ўтмаган. Аммо Антон Виткамп УЕФА бу мусобақани ўтказишни йўлга қўйиш ва унга расмий мақомни бериш учун курашган. Бир ўтиб эса УЕФА суперкубок ўтказишга розилик берган ва илк ўйин "Аякс" ҳамда "Милан" ўртасида кечган.
УЕФА суперкубок ўйини шу тариқа ташкил этилган.

Ушбу турнирда энг кўп ғалаба нашидасини сурган жамоа "Барселона" ҳамда "Милан" ҳисобланади. Ушбу жамоалар умумий ҳисобда 5 маротабан УЕФА суперкубоги соҳибига айланишган.
"Реал" эса ҳозирга қадар 3 бор УЕФА суперкубогида зафар қучган.
"Манчестер Юнайтед" эса учун бу галги УЕФА суперкубоги тўртинчи иштирок саналади. Бунга қадар жамоа икки бор суперкубокда ютқазган бўлса, 1991 йилги баҳсда ғалаба қозонган ва бир маротаба ушбу кубокни бошлари узра баланд кўтаришга муваффақ бўлишган.

УЕФА Суперкубогини қўлга киритиш бўйича Испания жамоалари пешқадам ҳисобланишади. Ла Лига вакиллари жами 13 бор совринга эгалик қилишган. Иккинчи ўринда эса Италия жамоалари боришмоқда. Англия эса учинчи поғонада, улар ҳисобида 7та УЕФА суперкубоги мавжуд. "Манчестер Юнайтед" бугун ушбу кўрсаткични биттага ошириш имкониятига эга.

УЕФА Суперкубогида ғолиб жамоа 5 миллион еврога, мағлубиятга учраган клуб эса 3 миллион еврога бойийди.

Бугунги ўйинга келадиган бўлсак, "Реал" айни пайтга келиб Европада тенгсиз бўлиб турибди.

"Манчестер Юнайтед" эса ўзининг шонли даврига қайтиш арафасида. Жозе Моуринью ўтган мавсумда уларни нуфузи жиҳатдан иккинчи даражали мусобақа ҳисобланган Европа лигасида ғолибга айлантирди. Бу йили эса жамоанинг мақсадлари янада жиддий. "Қизил иблислар" Европа лигаси орқали мухлислари соғиниб қолган ЕЧЛга қайтишди. ЕЧЛдан аввал эса улар ушбу турнирнинг амалдаги ғолибига қарши яна бир жиддий турнирда иштирок этишади. Бу ўйин МЮ учун ҳақиқий имтиҳонга айланади. Жамоа қанчалик йирик мусобақага, катта жамоаларга қарши ўйинга тайёр эканлигига бугун қисман жавоб оламиз.

Гарчи мавсумолди ўйинларда "Реал" кўпчиликни ҳафсаласини пир қилган бўлсада, бу уларни кучсизланиб қолганини англатмайди. Шунчаки Зинедин Зидан бу ўйинлар орқали натижаларга эмас, балки жамоанинг тактик чизгилари, футболчиларнинг имкониятлари ҳамда бошқа режаларини кўздан кечирди холос. Расмий ўйинларда жиддий "Реал"ни кўрамиз.
УЕФА суперкубогини қаторасига икки бор ютиш учун ҳам "Реал" бугун ўзининг яхши тарафларини кўрсатишга мажбур.
УЕФА суперкубогини 1990 йилдан буён ҳеч бир жамоа кетма-кет икки маротаба ютолмай келмоқда. Ўтган мавсум ЕЧЛни қаторасига икки бор ютишни уддалаган "қироллик клуби" бу УЕФА суперкубоги борасида ҳам бу ишни такрорлашга бор кучини сарфлайди.

Бу ўйин қиймати анча юқори. УЕФА Суперкубоги шунчаки соврин эмас, бу турнирда ҳар доим ҳам иштирок этиш насиб этавермайди. Клуб музейига ушбу соврин кўрк бағишласа бағишлайдики, аммо ҳечам ортиқчалик қилмайди. Яна ҳам ушбу ютуқ жамоани янги мавсум олдидан янада руҳлантириб юбориш билан биргаликда ғолиблик руҳини ҳам тақдим этади.
Ҳар иккала жамоа учун ҳам принципиаль тўқнашув бўлади.
Мотивация жиҳатидан ҳеч қандай муаммо йўқ.
Ўйин афишасини ўзиёқ барча саволларга жавоб беришга қодир.

"Реал" ёзги трансфер бозорида йирик харидларни амалга оширмади. Чунки жамоанинг ички резерви шундоқ ҳам анча бой. Аксинча, жамоа бир қатор номдор футболчиларни бошқа клубларга пуллашди. Аммо жамоа етакчилари ва юулдузлари ҳеч қаерга кетишгани йўқ. Муҳими, Роналду Мадридда қолди.
Мората ва Хамесни жамоадан кетиши "Реал"ни кучсизлантирмаслиги аниқ. Фақатгина Зидан ўтган мавсумда қилган ротацияларига бу сафар бироз ўзгартириш қилишига тўғри келади.

"Манчестер Юнайтед" ҳам ёзги трансфер бозорида жим қараб тургани йўқ. Жамоани кўп йиллик етакчиси Уэйн Руни ҳамда ўтган йили келган Златан Ибрагимович тарк этишди. Бу икки футболчини асосий таркибнинг муқим вакиллари дейиш ҳақиқатга тўғри келмайди. Руни анча аввал асосий таркибдан тушиб қолган бўлса, Златан жароҳати сабаб узоқ муддат сафдан чиққанди. Бу бўшлиқни тўлдириш мақсадида Моуринью жамоага Ромелу Лукакуни таклиф этди. Ярим ҳимоя таянч нуқтаси учун эса Неманья Матич жалб этилди. Лукаку орқали ҳужумдаги муаммо ҳал этилган бўлса, Матичнинг келиши билан таянч зона мустаҳкамланди ва Погбага ҳужумда эркинлик тақдим этилди.
Шунингдек, МЮ ҳимояга Линделофни таклиф этди.

Бугунги ўйин ҳар иккала жамоа учун мавсумдаги илк расмий беллашув бўлади. Ҳозирга келиб ҳеч бир жамоа жисмонан тўлиқ формада эмаслиги аниқ. Шу боисдан бугунги ўйинда мураббийлар кўпроқ тактик курашга эътибор қаратишади ва шу орқали ўз мақсадларига эришишга уриниб кўришади.

Реал олиб қарайдиган бўлсак, ушбу тўнашувда устунлик "Реал" тарафида. Аммо "Манчестер Юнайтед" деган номнинг ўзи ва жамоа бош мураббийининг қарашларини инобатга оладиган бўлсак, мадридликларни "сюрприз" кутаётган бўлиши ҳам мумкин.
Муҳими, учрашувни ҳакамлик бузиб қўймаса бўлгани.
Катта эҳтимол билан масала пенальтилар сериясига қадар ҳам етиб бориши мумкин.
Европа ареналаридаги илк ўйинга жуда оз фурсат қолди. Бизни қизиқарли ва шиддатли ўйин кутаётгани рост.

Бу ўйин Зизу ва Моур қарама-қаршилигининг дебочаси бўлади. Янги мавсумда ҳали яна бир бор ушбу қарама-қаршиликдан баҳраманд бўлишни барча истаса керак.

Зизу ва "Реал"нинг кучли иродасини синдириш ўзгача мураббийнинг қўлидан келадими?

Ушбу саволга жавобни тунда Македония пойтахтидаги "Филипп II" стадиондан излаймиз.

УЕФА суперкубогининг бу йилги ўйини Македония пойтахти Скопье шаҳрида бўлиб ўтади.

Жамоаларнинг мавсумолди ўртоқлик учрашувлари
"Реал"
23.07: "Реал" - "Манчестер Юнайтед" 1:1 (пен 1:2, Санта-Клара, АҚШ)
26.07: "Реал" - "Манчестер Сити" 1:4 (Лос-Анджелес, АҚШ)
29.07: "Реал" - "Барселона" 2:3 (Майами, АҚШ)
02.08: "Реал" - "MLS юлдузлари" 1:1 (пен 4:2, Чикаго, АҚШ)

МЮ
15.07: "Лос-Анджелес Гэлэкси" - "МЮ" 2:5 (Карсон-Сити, АҚШ)
17.07: "МЮ" - "Реал Солт-Лейк" 2:1 (Сэнди, АҚШ)
20.07: "МЮ" - "Манчестер Сити" 2:0 (Хьюстон, АҚШ)
23.07: "МЮ" - "Реал" 1:1 (пен. 2:1, Санта-Клара, АҚШ)
26.07: "Барселона" - "МЮ" 1:0 (Ландовер, АҚШ)
30.07: "Волеренга" - "МЮ" 0:3 (Осло, Норвегия)
02.07: "МЮ" - "Сампдория" 2:1 (Дублин, Ирландия)

УЕФА СУПЕРКУБОГИ-2017
"Реал" (Испания) - "Манчестер Юнайтед" (Англия)
Македония, Скопье шаҳри.
"Филипп II" стадиони.
Бош ҳакам: Жанлука Рокки (Италия)

"Реал" (тахминий таркиб): Навас; Карвахаль, Рамос, Варан, Марсело; Модрич, Каземиро, Кроос; Иско, Бензема, Бэйл.
Сўроқ остида: Роналду (спорт формасини тўлиқ тиклагани йўқ)
"Манчестер Юнайтед": Де Хеа; Валенсия, Линделеф, Смоллинг, Блинд; Эррера, Матич, Погба; Рэшфорд, Лукаку, Мхитарян.

Ўйнамайди: Бейи (дисквалификация), Джонс (дисквалификация), Рохо (жароҳат), Шоу (жароҳат), Янг (жароҳат)

Шаҳбоз Беғамов тайёрлади

Превью. Қўрқинчли афиша: "Реал" - МЮ ёхуд Зизу & Моур