Yig'ilishda barcha jamoalarning murabbiylari, direktorlari va vakillari ishtirok etishdi. Biz esa marosim yakunida ularning ayrimlarining fikrlari bilan qiziqdik.

Jahongir Jiyamurodov (“Zomin” jamoasi bosh murabbiyi): Maqsadimiz yaxshi o'rinlarni egallash va munosib ishtirok etish. PFLning natijaga jiddiy etibor qaratmagan holda yoshlarga etiborni qaratish, jamoalarning o'rinbosarlar jamoasini ham shakllantirish haqidagi qarori to'g'ri bo'ldi. Oldin faqat Superliga jamoalaridagina o'rinbosarlar jamoasi bo'lardi. Qura haqida fikr bildiradigan bo'lsam, birinchi turni safarda o'tkazamiz. Bu qaysidir manoda bizga maqul keldi. Sababi yangi stadionimiz tayyor bo'lish va ishga tushirilish arafasida turibdi. Nasib qilsa 28 aprel kuni ochilishi kutilmoqda. Unga qadar to'rtta turda mehmonda o'ynaymiz.

Tolibjon Qosimov (“Sho'rtan” klubi vakili): Jamoamiz oldiga har mavsumda yuksak vazifalar qo'yiladi. Garchi, so'ngi uch yilni quyi ligada o'tkazgan bo'lsakda, u erda futbol muhiti, talabchan muxlislar bor. Joriy yilda yangi rahbariyat ish boshladi, klub tizimida o'zgarishlar ro'y berdi. Rejamizdan faqat Superligaga chiqish o'rin olgan. Harakat qilmaymiz, balki jiddiy tarzda yonadashamiz. Boshqasi jamoani qoniqtirmaydi. Umuman olganda Pro Ligadagi jamoalarga nazar soladigan bo'lsak, hammasi teng kuchli jamoalar. Intiriga, Superliga uchun kurash nihoyatda qizg'in ruhda kechadi deb o'ylayman. Istasak, istamasak barcha jamoalar bilan o'ynab chiqishimizga to'g'ri keladi. Shuning uchun og'ir yoki engil keldi deya olmayman.

Abduvohid Ahmadaliev (“Turon” jamoasi rahbari): Futbol klubimizning birinchi galdagi vazifasi Superligaga yo'llanma olish. Shuningdek, akademiyamizni rivojlantirishni maqsad qilganmiz. Bosqichma-bosqich jamoamizni shakllantirmoqchimiz. Shu orqali O'zbekistonning eng raqobatbardosh jamoasiga aylantiramiz. Buning uchun bizda barcha narsa etarli. Moliyaviy va tashkiliy tomondan muammolar yo'q. Akademiyada umumiy to'rtta maydon qad rostlaydi, ikkita suniy va ikkita tabiiy maydon. Bolalar futbol bilan shug'ullanishlari uchun hamma sharoitlarni yaratib beramiz.

Abdulaziz Iskandarov yozib oldi.

Pro Liga 2020. Quradan so'ng murabbiylar qanday fikrda?