Unda muxlislar bir qator qiziqarli bahslarga guvoh bo'ldi deyish mumkin. Xususan “A” guruhidagi o'yinlarda sensaciya qayd etilmadi. Oldindan favorit deya etirof etilgan jamoalar yakunda g'olib bo'ldi.

Etiborlisi 10-turda durang natijasi qayd etilmadi. Safarda g'alaba qozongan yagona jamoa esa “Mashal” bo'ldi. “A” guruhidagi peshqadamlik qilayotgan “gazchilar” bu turda “Orol” maydoniga safar uyushtirib, 1:0 hisobida zafar quchdi.

10-turning to'rtta o'yinida jami 12ta gol qayd etildi. Bu har bir bahsga o'rtacha 3tadan gol demakdir.

Eng ko'p gol urgan jamoa “Surxon” bo'ldi. Termizliklar o'z maydonida “Xorazm”ni qabul qildi va raqib darvozasini 4 bor aniq nishonga oldi.

“Sho'rtan” va “Mashal” jamoalari ushbu turda o'z darvozasi dahlsizligini saqlab qolishga erishdi.

Ushbu turda mezbonlar tomonidan kiritilgan gollari soni 9tani tashkil etgan bo'lsa, qolgan 3ta to'p mehmonlar hisobiga yozildi.

Uchrashuvlarning birinchi bo'limida muxlislar 7ta golga guvoh bo'ldi. Ikkinchi taymda esa darvozalarga yana 5ta to'p kiritildi.

10-turning eng tezkor goli 8-daqiqaga to'g'ri keldi. “Surxon”ning markaziy himoyachisi Najmiddin Normurodov “Xorazm” darvozasiga birinchi bo'lib to'p kiritib, hisobni ochishga muvaffaq bo'ldi.

Aksincha 10-turning eng so'nggi daqiqasida kiritilgan gol 83-daqiqada sodir bo'ldi. Bu ham “Surxon” – “Xorazm” o'yinida yuz berdi. Urganchliklarning to'purar hujumchisi Qadamboy Nurmetov uchrashuvning so'nggi daqiqalarida hisobni bittaga qisqartirishga erishdi.

Ushbu turda dublga erishgan futbolchi Bahriddin Vahobov bo'ldi. “Surxon”ning tajribali hujumchisi “Xorazm” bilan o'yinda 2ta to'p kiritib, jamoasining yirik hisobdagi g'alabasiga hissa qo'shdi.

Shuningdek 1ta avtogol qayd etildi. “Dinamo” himoyachisi Mirkomil Loqaev “Andijon”ga qarshi bahsning 17-daqiqasida kutilmaganda o'z darvozasiga to'p kiritib yubordi.
Uchrashuvlarning ikkinchi bo'limidan ikkita penalti yuz berdi. Etiborlisi ularning barchasi aniq amalga oshirildi. “Andijon” himoyachisi Nodir Mavlonov “Dinamo” darvozasini aniq nishonga olgan bo'lsa, “Surxon” jamoasi sardori Bahriddin Vahobov ham 11 metrlik nuqtadan aniq foydalandi.

10-turda kimlar gol urdi?
1. Mirkomil Loqaev (avtogol) – “Dinamo”.
2. Shoxruh Boyqo'ziev – “Andijon”.
3. Nodir Mavlonov – “Andijon”.
4. Zohir Qo'ziboev – “Dinamo”.
5. Zafar Akromov – “Mashal”.
6. Og'abek Erkinov – “Sho'rtan”.
7. Jasur Xolto'raev – “Sho'rtan”.
8. Najmiddin Normurodov – “Surxon”.
9. Bahriddin Vahobov (2ta) – “Surxon”.
10. Farhod Tojiev – “Surxon”.
11. Qadamboy Nurmetov.

PRO-Liga, “A” guruhi. 10-turning eng tezkor goli va boshqalar haqida