Odatga ko'ra, tur yakunlari bo'yicha muxlislarning stadionga tashrifi borasida sarhisobni etiboringizga havola etamiz.

Afsuski PRO-Liganing “B” guruhidagi o'yinlarga tomoshabindarning qiziqishi juda ham past darajada bo'lmoqda. Vaholanki ayrim jamoalar stadionga kirishni bepul qilib belgilagan. Shunga qaramay, ishqibozlarning tashrifi bazida 1000dan ham oshmayapti.

Xususan, 6-turning 4ta o'yiniga jami 4086 nafar muxlis kirgan. Bu har bir bahsga o'rtacha 1021 tomoshabin demakdir.

Eng ko'p ishqiboz kuzatgan uchrashuv “Iftixor” – “Lokomotiv-BFK” bo'ldi. Oltiariqdagi o'yinga 2386 odam kirgani, uchrashuv qaydnomasida ko'rsatib o'tilgan. Afsuski ushbu raqamlar turning eng yuqori ko'rsatkichi bo'lib tarixda qoladigan bo'ldi.

Aksincha eng kam ishqiboz tashrif buyurgan bahs esa “Nurafshon” – “Yozyovon” bo'ldi. Liga debyutanti Toshkent viloyatining “Nurafshon” jamoasi hali beri o'z muxlislarini topib ulgurmagani bilinib turibdi.

Bundan tashqari Samarqand va Buxoro viloyatlarida bo'lib o'tayotgan o'yinlarga ham tomoshabinlar tashrifi 1000dan ham ortmayapti.

Tomoshabinlar tashrifi kimda qanday?

“IFTIXOR” – “LOKOMOTIV-BFK” – 1:0 (0:0).
Oltiariq shahri. “Markaziy” stadion. 2386 tomoshabin.

“SHERDOR” – “XOTIRA-79” – 3:1 (2:0).
Samarqand shahri. “Dinamo” stadioni. 203 tomoshabin.

“NURAFSHON” – “YOZYOVON” – 2:0 (2:0).
Toshkent viloyati. “Do'stlik” stadioni. 152 tomoshabin.

“ZOMIN” – “G'IJDUVON” – 1:0 (0:0).
Zomin shahri. “Markaziy” stadion. 1345 tomoshabin.

PRO-Liga, “B” guruhi. 6-turda Oltiariqda bayram