- Bugun jamoa bir ochko yo'qotdimi yoki qo'lga kiritdimi?

- Shubhasiz, ochko yo'qotdik. Bugun faqat g'alaba ilinjida kelgandik. Ammo, tan olaylik “Norin” ham hurmatga sazovor klub ekanligini yana bir karra isbotladi. Bu jamoa tarkibi 2-3 yildan buyon deyarli o'zgarmayapti. Mavsum oldi yig'inda ham “Norin” “Andijon” va “Surxon”ni mag'lub etgandi. Shunday ekan, “Norin” jamoasini kuchsiz jamoa deb bo'lmaydi. “Dinamo” Oliy Ligaga yo'l olgan 2016 yilda ham “Norin” bizga asosiy raqobatchi bo'lgandi. O'shanda ham mavsumni yaxshi boshlay olmagan bo'lsakda, yakunda Oliy Ligaga chiqqandik.

- Bugun g'alaba uchun jamoaga nima etishmadi?

- Bu bahs mavsumning boshlanishi ekanligini inobatga olish kerak. Qolaversa, o'yin davomida vaziyatlardan foydalana olmadik. Ikkinchi bo'limda hujumkorlikni oshirdik, Amirjon Safarovda yaxshi imkoniyat bo'lgandi, ammo omad bizdan yuz o'girdi. Jamoamiz o'yini yomon chiqmadi, faqat bugun raqib ham yaxshi o'ynadi, qolaversa g'alaba uchun omadimiz ham kelmadi.

- “Dinamo” endi 3-turda “Mashal”ga qarshi maydonga tushadi...

- Oldimizda kubok doirasidagi “Xotira-79” va “Mashal” bilan bahs turibdi. 2-turda dam olishimiz bois, xatolarni tahlil qilib, ushbu bahslarga jiddiy tayyorgarlik ko'ramiz. Pro-Liga yangi formatida hech bir jamoaga oson bo'lmaydi. Maqsadimiz Superligaga chiqish, qo'l ostimizda yaxshi jamoa yig'ilgan. Shunday ekan, mavsum esa endi boshlandi, kurashishda davom etamiz.

Usmon IBODOV yozib oldi.

PRO-liga. Uchqun Qobilov: "G'alaba uchun "Dinamo"ga omad etishmadi"