“Ювентус” сўнгги уч йил ичида Чемпионлар Лигасининг финалига икки марта етиб келди. Аммо ҳар сафар испан грандларидан мағлубият қабул қилиб олди. Нима демоқчиман, “кекса сеньора” мусобақада зафар қучиши учун ўша уч йилда кўпроқ ҳақли эди. Ўшанда Аллегри жамоаси “Тоттенҳэм” кабиларни ўзига яқинлаштирмасди, Туринда енгиб бўлмас жамоа эди. Бу мавсумда эса “Ювентус” сўнгги 5 йилликдаги турғунлигини сақлаб қола олмади. Бир қатор клублар унинг уйидан гердайиб қайтишга муваффақ бўлишди.

“Ювентус” Криштининг илк тўқнашувдаги фантастик голидан кейиноқ енгилиб бўлганди. Аниқроқ қилиб айтганда, биргина гол ярим финалга ким кўпроқ ҳақли деган саволни кун тартибидан олиб ташлагандек кўринди. Бироқ Парижнинг бойвучча клубидан фарқли равишда “Ювентус” ўзида куч топа олди ва “Бернабеу”даги 1 соати ичида 3 та гол уриб улгурди. Шу лаҳзалардан бошлаб “Ювентус” кейинги босқичга ҳақлидек кўринди. Ана энди юқоридаги саволга яна қайтаман: сўнгги уч йилликдаги “Ювентус” кубокни олишга кўпроқ ҳақли эдими ёки ўз уйида бир-икки тарсаки қабул қилиб улгурган бу йилгисими?

Қўшиламан, бу Буффон учун сўнгги имконият эди. Бироқ ўша лаънати “Олтин кубок”ни барибир унга беришмаяпти. Аммо у қаҳрамон. Буффонни фақатгина италияликлар эмас, “Ювентус”ни кўрарга кўзи йўқ футбол мухлислари ҳам тан олиб улгурган. Демак, унга қаҳрамонликнинг “Олтин тўп”дан бошқа тўни кийдирилиши керак эди. Ўша тўн қизил карточка бўлди.

Агар “Ювентус” шунчаки чемпион бўла олмаганида, биз Буффондек тажрибали посбонга Чемпионлар Лигаси кубоги насиб қилмаганди дебгина эслаб қолардик. Кечаги иш эса “Реал”нинг муваффақиятини тўғри қабул қилганим ҳолда айтаман, ўтмишга хаёлан қайтишимизга катта таъсир ўтказади. Яъни, биз энди Жижига кубок насиб қилмаган деб эмас, унга кубокни беришмаган охирги ўйинида майдондан ҳайдабгина, “Ювентус” дарвозасига гол уришган деб эслаб қоламиз. Бунинг фарқи бор, менимча.

Энди эса 2006 йилги Жаҳон Чемпионати финалини ёдга олинг. Зидан финалдаги ўша воқеасиз ҳам биз учун қаҳрамон эди. Аммо унинг Франция термасидаги сўнгги ўйини қачон бўлганди деган саволга ўрин қолдирмаганди Зизу ва ўша олган қизил карточкаси билан қаҳрамонлик тўнини кийганди. Жаҳон кубоги эса дарвозасини Буффон қўриқлаган Италияга насиб қилди. Финалгача бўлган ўйинлар кўрсатгандики, Зиданни майдондан улоқтириб ташламагунча, Францияни енгиш иложсиз. Италия эса бунинг осонроқ йўлини топа олди.

Кеча Буффон худди Зидан каби қаҳрамонга айланди. Қизиғи, 2006 йилги финалда майдонни алам билан тарк этган қадрдон дўсти Зиданнинг олдидан ўтиб, ўзи алам билан майдонни тарк этди. Бундай ажойиб интихо ҳам фақат буюкларга насиб қилади. Буффон эса мана шундай буюк инсон эди.

Фактан ғолиб “Реал” бўлса-да, зотан биз “Ювентус”ни қаҳрамон деб билдик. Мана энди сизга бошқа бир савол: “Тоттенҳэм”, “Ювентус” каби жамоалардан енгилаётган “Реал” чемпионликка ҳақлимиди ёки ўтган йиллардаги “Реал”ми? Сўнгги икки йилликдаги гегемонлик “Реал”га қанчалик ярашган бўлса, бу йил “Қироллик клуби” камида чемпионликка муносиб эмасдек. Энди “Рома” ватандош жамоаси учун ўйнаши, Анчелотти кетганидан буён Хайнкес билан даҳшатга айланаётган “Бавария” жавлон уриши, Гвардиоланинг қўрқинчли “Сити”сини икки йилда 3 марталаб таслим қилаётан “Ливерпуль” янги тарих ёзиши мумкиндир балки. Чунки “Реал” ғолиб чиқса, унинг финалгача қандай етиб келгани ҳали кўп муҳокама қилиниши мумкин. Ҳатто бунга “Реал” футболчилари айбдор бўлмаган тақдирида ҳам.

Қаддингни кўтар, Жижи. Сен барибир қаҳрамон бўлиб қоласан