2024 yilning avgust oyiga kelib bir nechta tajribali va nomdor hakamlar radarlardan yo'qolib qoldi. Garchi ularning ayrimlari xalqaro maydonda faoliyatini davom ettirgan bo'lsa ham. Mavsum yakunida O'zFHM matbuot xizmati ko'rinish bermayotganlardan faqat Aziz Asimov borasida bayonot berdi va u hakamlikdagi faoliyatini yakunladi. Eng qizig'i ro'yxatdagi hakamlar rasman diskvalifikaciya qilinmagan bo'lsada, nima uchundir ichki chempionatda avgustdan so'ng birorta o'yinga tayinlanmadi. Lekin yaqinda FIFA tomonidan 2025 yil uchun xalqaro maydonda ishlaydigan hakamlarimiz ro'yxati elon qilindi. Qizig'i unda Firdavs Norsafarov va Akobirxo'ja Shukurullaev ham bor. Ular o'sha "guruh"ning azolari va oxirgi marta Superligada o'tgan yil avgustda tayinlov olgan. Superligada ish topilmayotgan hakamlarni OCHL va boshqa musobaqalarda ko'rishimiz mumkin.
O'zFHM nimani yashirmoqda? Aziz Asimov, Firdavs Norsafarov va boshqa hakamlar qaerda?
Xo'sh, agarda hakamlar xato qilgani uchun "tozalangan" bo'lsa, demak, bu ishning boshqa ishtirokchilari ham bo'lishi kerakku?! Adolatni taminlash uchun o'sha ikkinchi tomondagi shahs(lar), klublarimizga ham chora ko'rish kerakmasmidi? Fikrimizcha, mantiqan olib qaralganda ham bu erda faqat xato bir tomondan o'tmagan bo'lishi kerak. O'ylantiradigani shuki, malum darajada tajribaga ega, Superliganing qator o'yinlarida ishlab ulgurgan hakamlar yakunda "chopilishdi". Bitta hakamlarni yo'q qilib yuborish bilan chempionatni shunchaki ideal qilib qo'yish qiyin va ilojsiz ish hisoblanadi. Bu bilan nimagadir shama qilmoqchi emasman. Lekin o'rmonga o't ketganida daraxtlarni o'zi yonib ketmaydi. Aziz Asimov O'zFHM direktori bo'layotgani haqidagi xabarlar qo'log'imga chalindi. Superliga va turli darajadagi katta-kichik xalqaro uchrashuvlarda faoliyat olib borgan Asimov ham yuqoridagi "yo'qolib qolganlar"ning orasida bo'lgandi. Bundan kelib chiqadiki, malum vaqt o'yindan chetga chiqqan hakamga endi kattaroq lavozim nasib qildi. Aziz Asimov yaxshi saviyadagi hakam bo'lgan - bu fakt. Ammo avvaliga norasmiy malumotlarga ko'ra, o'yinlardan chetlatilgan mutaxassis undan ham muhimroq ishga tayinlandi. Istaymizmi yoki yo'q, bu yana javobsiz savollarni keltirib chiqaradi. Aytmoqchi bo'lganimiz, bu erda muammo faqatgina hakamlarda bo'lmagan va bundan keyin ham unday bo'lmaydi. "Qars ikki qo'ldan chiqadi", deyishadi. Superligamizdagi muammo faqatgina hakamlar bilan bog'liq emas va uni hal qilish uchun faqatgina referilarni jazolash noto'g'ri. Asimov bu ishga kirishadigan bo'lsa, vatan yo'lida astoydil qamishdan bel bog'lab ishlasa bu foydali bo'lishi mumkin, chunki u hakamlar ichidagi barcha mayda detallargacha biladi. U hammani to'g'ri yo'lga yo'naltira oladi.
Abdulaziz Iskandarov
Izohlar