Nihoyat stadion futbol uchrashuvlari o'tkazilishiga tayyor qilindi. Muxlislarimizning uzoq kutgan orzusi amalga oshdi.

“Markaziy” stadion 2006 yili foydalanishga topshirilgan bo'lib, 2009 yili ”Nasaf” PFK ixtiyoriga berilgan edi.

Stadionda keng ko'lamdagi rekonstrukciya ishlari amalga oshirildi. Stadionimiz rekonstrukciyadan so'ng ko'pgina o'zgarishlarga ega bo'ldi. Misol tariqasida aytish mumkinki, rekonstrukciyagacha o'rindiqlar soni 16 000 edi, hozir esa o'rindiqlar soni 21 000taga etkazildi. Stadion futbol maydoni tubdan o'zgartirildi. Maydonga zamonaviy muhandislik komunikaciyalari o'rnatildi. Futbol maydoniga "Kentucky bluegrass" navli yangi chim yotqizildi. Eng muhimi tomoshabinlar bilan maydon oralig'i ancha yaqinlashtirildi. Bu o'zgarish futbol ishqibozlari uchun ancha qo'laylik yaratadi.

Biz hozir hamma o'zgarishlar haqida to'xtalib o'tirmaymiz. Bu haqda keyinroq muxlislarimizga batafsil malumot beramiz. Siz aziz muxlislar 30 iyun kuni stadionimizning tanatanali ochilishiga tashrif buyursangiz, o'zgarishlarni o'z ko'zingiz bilan ko'rasiz.

Endi 30 iyun kuni bo'ladigan tadbirlar haqida batafsil. Demak, 30 kuni “Markaziy” stadionni tanatanali ochilish marosimi bo'ladi. Marosimlar soat 18:00dan boshlanadi. Shu kuni taniqli sanatkor va “Nasaf” futbol klubining ashaddiy muxlisi - Davron G'oipov siz aziz muxlislarga o'zining koncert dasturini taqdim qiladi.

Soat 19:30dan boshlab, O'zbekiston kubogi chorak finalining dastlabki uchrashuvi boshlanadi. Unda “Nasaf” jamoamiz “Qo'qon-1912” jamoasi bilan kuch sinashadi. Bu uchrashuvga bo'lgan qiziqish juda yuqori. Zero, bu yilgi kubok bahslarida jamoamiz uchun bu uchrashuv muhim o'rin tutadi.

Shunday qilib, barcha futbol ishqibozlarini 30 iyun kuni “Markaziy” stadionimizga taklif etamiz.

Muxlislarimizga shuni malumot tariqasida aytib qo'ymoqchimizki, rekonstrukciyadan so'ng stadion sektorlarining raqamlanishi bo'yicha ham o'zgarishlar sodir bo'ldi. Bu o'zgarishlarni quyidagi surat orqali ham bilib olishingiz mumkin.

Uchrashuv chiptalari 27 iyun seshanba kunidan stadion qoshidagi chiptaxonlar orqali sotuvi boshlanadi.

Chiptalar narxi:

CIP sektordagi o'rindiqlar (900ta) – 20 000 so'mdan

Markaziy sektorlar (1, 2, 6, 7, 8) – 15 000 so'mdan

2-qavatdagi sektorlar (12, 13, 14, 15, 16, 17, 18) – 10 000 so'mdan

Darvoza ortidagi sektorlar (3, 4, 5, 9, 10, 11) – 8 000 so'mdan

Barcha futbol ishqibozlarini 30 iyun juma kuni “Markaziy” stadionimizga taklif etamiz. Marhamat qiling, miriqib hordiq chiqaring!

Qarshidagi “Markaziy” stadionning tantanali ochilishiga marhamat qiling!