Мазкур Ўзбекистон кубогида Қашқадарё вилояти жамоаси (бош мураббийи Ботир Қодирқулов) барча рақибларидан устунликка эришиб, ғолибликни тантана қилишган эди. Эътиборлиси, 2002 йилда туғилган ўсмирлар жамоасининг асосий таркибида тўп суриб, кубокни қўлга киритишда муносиб ҳиссаларини қўшган Асилбек Бердиалиев, Шерали Расулов, Шахобиддин Самадов ҳамда Салоҳиддин Санақуловлар Қашқадарё вилояти болалар-ўсмирлар футбол академияси тарбияланувчилари саналишади.

29 ноябрь куни Қарши шаҳридаги 47-умумий ўрта таълим мактабида вилоят болалар-ўсмирлар футбол академияси ташаббуси билан ушбу тўрт нафар чемпион ўқувчиларни тақдирлаш маросими ўтказилди. Маросимда иштирок этиб, сўз олган Қашқадарё вилоят футбол ассоциацияси вице-президенти Норқул Даминов, “Машъал” футбол кулубининг ёрдамчи мураббийи Ботир Қораев, футбол академияси директори Нурали Султонов, футбол академиянинг маънавият-маърифат ишлари бўйича директор ўринбосари Шавкат Рўзиевлар кубок соҳибларини қутлаб, келгусида ўзбек футболида ёрқин юлдузлар қаторида бўлишини, миллий терма жамоамиз сафида бўй кўрсатишида омадлар тилашди. Ўз навбатида иқтидорли саналган ёш чемпионлар ҳам яратилган қулай шарт-шароитлардан унумли фойдаланган ҳолда машғулотларга зўр бериб, орзу-истаклари сари дадил боришига ваъдалар беришди. Тадбир сўнггида ғолиб ўқувчиларга вилоят футбол ассоциацияси, футбол академияси томонидан диплом ва эсдалик совғалари билан муносиб тақдирланишди.

Илҳом РАҲМОНОВ тайёрлади

Қашқадарё вилоят болалар-ўсмирлар футбол академияси чемпионлари муносиб тақдирланишди