"Biz ertaga qiyin bahs bo'lishini bilib turibmiz. Saralash bosqichi o'z yakuniga yaqinlashib bormoqda. Har bir jamoa natija uchun o'ynashni boshlagan. Natija biz uchun ham juda muhim. Biz ertaga o'zimizga kerakli bo'lgan natijaga erishishga harakat qilamiz", - deya fikr bildirdi Maksim Lisicin ertangi bahs oldidan.

"Ertaga katta ajiotaj bo'lishi kutilmoqda. Ikki jamoa ham muxlislar uchun qiziqarli bo'ladigan futbol namoyish etishadi degan umiddaman", - dedi jamoa sardori Valeriy Kichin.

- Chempionatda ikki tur o'tkazildi. Premer-ligada to'p tepayotgan futbolchilarning jismoniy holati va tayyorgarligi haqida gapirib o'tsangiz. Shuningdek, legionerlarning holati qanday?

- Holat unchalik yomon emas, yaxshi deb ham ayta olaman. Biz oz bo'lsa ham tayyorgarlik o'tkazdik. Chempionatning dastlabki ikki bahslari bizga katta yordam berdi deya olmayman. Sababi futbolchilar suniy maydonda o'ynashdi. Endi esa ular tabiiy maydonga o'tishmoqda. Ushbu holat futbolchilarga muammo tug'dirishi mumkin. Biz o'yinga tayyormiz deb o'ylayman. Har bir soniyadan unumli foydalanishga va o'yinlarga yaxshiroq tayyorgarlik ko'rishga maksimal harakat qilmoqdamiz.

- O'tgan yili sentyabrda O'zbekistonga qarshi o'tkazilgan bahsdan oldin Qirg'iziston terma jamoasi Erondan Bishkekka etib kelishda muammolarga duch kelgandi. Aynan shu logistik muammolar sababli tayyorgarlik biroz qiyin kechgani haqida aytib o'tgandingiz. Bu safar Qirg'iziston terma jamoasi bunday muammolarga duch kelmadi. Jamoangiz ertangi o'yinga to'liq tayyormi?

- Bu safar logistika masalalari bo'yicha muammolar bo'lmadi. Bir nechta legioner futbolchilarimiz xorijdan uchib kelishdi xolos. Umuman olganda, tayyorgarlik yaxshi o'tdi. Ertangi bahsni Bishkekdagi o'yin bilan solishtirish biroz g'alati. Oradan ancha vaqt o'tdi. Ko'pgina futbolchilar o'z klublari bilan yangi mavsumga tayyorgarlik jarayonlarini o'tashdi. Biz nimaga qodir ekanligimiz va maksimum darajamizni ko'rsata olishimizni ertaga maydondagi harakatlarimiz orqali bilib olamiz. O'ylaymanki, futbolchilar bahsga 100% tayyor.

- O'zbekiston terma jamoasining ayni damdagi himoya chizig'ini qanday baholaysiz?

- Zamonaviy futbolda aynan bir chiziqni yoki poziciyani baholash noto'g'ri. Masalan, jamoaning umumiy himoyaviy harakatlarini baholash mumkin. O'zbekiston terma jamoasida o'ta kuchli futbolchilar borligini bilamiz va aynan shu sababli terma jamoangiz himoyada ham ancha ishonchli harakatlanadi.

- Qirg'iziston terma jamoasi o'z uyida yaxshiroq o'ynamoqda degan taassurot bor. Masalan, O'zbekistonga va Eronga qarshi bahs. Shuningdek, KXDR ham Bishkekda mag'lub etildi. Safar o'yinlaridagi natijalar esa yaxshi emas. Qirg'iziston terma jamoasi uchun safarda o'ynash haqiqatan ham qiyinroqmi?

- Menimcha, ushbu bosqichda bizga biroz tajriba etishmayapti. Shu sababli mehmon sifatida o'tkazayotgan bahslarimizda qiynalmoqdamiz. O'z uyimizda esa muxlislar bizni ajoyib tarzda qo'llab-quvvatlashadi va bu bizga yanada ko'proq ishtiyoq beradi. Safardagi bahslarda ham yaxshiroq natijalar qayd etishga harakat qilmoqdamiz. Ushbu muammo ustida ishlayapmiz.

- Valeriy, siz o'tgan mavsumda O'zbekiston chempionatida to'p tepdingiz. Ushbu jihat sizga ertangi bahs oldidan qo'l kelishi mumkinmi?

- Yo'q. Klub futboli va terma jamoa darajasi katta farq qiladi. Shuningdek, O'zbekiston terma jamoasining asosiy tarkib futbolchilari asosan legionerlar.

- Qirg'iziston terma jamoasi bunga qadar O'zbekistonga qarshi to'qqiz marotaba to'qnash kelgan va barcha o'yinlarda mag'lub bo'lgan ekan. Ushbu statistika sizlarga bosim o'tkazmayaptimi?

- Menimcha, yo'q. Ushbu fakt ko'proq muxlislar va rahbariyatga tasir o'tkazsa kerak. Futbolchilar esa bunga etibor berishmaydi. Futbolchilar faqatgina yaxshiroq o'yin namoyish etish haqida o'ylashmoqda.

- Qirg'iziston prezidenti Bishkekdagi bahsdan oldin, agar terma jamoa g'alaba qozonsa, avtomobil sovg'a qilishini vada bergan degan fikrlar tarqalgandi. Ertangi bahs oldidan ham shunday vadalar berildimi?

- O'zbekiston prezidenti vada berganmi?(kuladi). Yo'q, men bundan xabardor emasman. Futbolchilarda motivaciya etarli. Bu gap-so'zlar ko'proq muxlislar va futbol atrofidagi insonlarga tegishli. Futbol federaciyasi bizni juda yaxshi qo'llab-quvvatlab kelmoqda. Siz aytgan gaplardan xabarim yo'q.

Qirg'iz Respublikasi terma jamoasi ustozi Maksim Lisicin matbuot anjumanida nimalar dedi? (matbuot anjumani to'liq holda)