Kuni kecha, O'zbekison milliy terma jamoasining etakchisi Islom To'xtaxo'jaev ham "Qizilqum" himoyachisiga aylandi. Biz esa bu borada futbolchining fikrlari bilan qiziqdik.

- "Qizilqum"ga o'tish qay tariqa yuz berdi?

- "Shenyang Urban" bilan muammolar yuzaga kelgach oldimda kam vaqt qolgandi. O'zbekistonda ham tez orada transferlar oynasi yopiladi. "Qizilqum" bosh murabbiy Hamidjon Aktamov bilan muzokaralarimiz tezda hal bo'ldi. Jamoaga yordam berishga qaror qildim.

- Qishki yig'inlar pallasida "Bunyodkor" safida mashg'ulotlarda ishtirok etib yurgan edingiz. Boshqa jamoalardan xususan, "Bunyodkor"ning o'zidan taklif tushdimi?

- Boshqa klublardan ham takliflar bo'ldi. Lekin, bir tomondan barcha jamoalar deyarli tarkibini shakllantirib ulgurdi. Shuning uchun o'ylab yakunda "Qizilqum"da to'xtaldim.

- Navoiyliklarning chorlovi siz uchun ham kutilmagandek tuyuldimi?

- Bunday holatlar futbolda ko'p bo'lib turadi. Shunisi bilan ham qiziq.

- So'nggi paytlarda Xitoy klublarida bankrotlik va boshqa shunga o'xshash muammolar yuzaga kelmoqda. Sizningcha bu holat nima bilan bog'liq bo'lishi mumkin?

- Pandemiya o'z tasirini o'tkazmay qolmadi. Ko'p korxonalar, tashkilotlar to'liq ishlamadi. Menimcha shuning hisobiga, deb o'ylayman.

- "Qizilqum"ning qaysi jihatlari sizni o'ziga jalb qildi?

- Yangi maqsadlar, katta marralarni zabt etishni klub o'z oldiga maqsad qilib qo'ygan. Shu jihati qiziqtira oldi.

- Terma jamoamizning so'nggi o'yinlaridagi muvaffaqiyatsizliklar ko'plab tanqidlarga sabab bo'ldi. Jamoaning ichidagi futbolchi sifatida hozirgi vaziyat haqida nima deya olasiz?

- Bu yig'inga jalb qilinganlarning ko'pi yoshlar. Ularda terma jamoa darajasidagi tajriba kam. Barcha bir-birini tushunib olishi uchun ham bunday yig'inlar juda ham kerak.

Abdulaziz Iskandarov suhbatlashdi

"Qizilqum"ga o'tish qarori, Xitoy klublaridagi bankrotlik va terma jamoa". Islom To'xtaxo'jaev bilan intervyu