“Navbahor” va “Paxtakor” bosh murabbiylarining o'ziga 1-o'rinni berishi ko'pchilikka erish tuyulgani tushunarli. Biroq men bundan xursand bo'ldim. Agar mutaxassislarimizda o'ziga bo'lgan ishonch va qatiyat oshayotgan bo'lsa, biz bundan faqat xursand bo'lishimiz kerak.

To'g'ri, ko'pchilik bu kabi ishlarga ko'nikmagan. O'ziga-o'zi ovoz berishni yo'q qilish kerak, deyayotganlar ham bor. Mana shunday insonlarga samimiy savolim bor: nega endi qandaydir stereotiplardan yorib chiqib keta olmaymiz? Mourino o'zini eng yaxshi bilsa, Gvardiola o'ziga ishonsa rohat olamiz-u, o'zimizning mutaxassislarga buning uchun yo'l bermaymizmi?

Qo'yib beraylik, mayda 4 ta o'yindan 4 tasini yutyaptimi mutaxassis, demak, o'zini kuchli hisoblaydi. Kimdadir harakter umuman boshqa, kuchli ekanini bilib tursa ham, kamtarlik qiladi va o'zini belgilamaydi. Biz esa murabbiylar, futbolchilarning harakterlarini ham bilib boramiz, ular o'rtasidagi munosabatlar, qarashlar, principlarga tushungandek ko'rinamiz.

APL faqat futboli bilan emas, Mourino va Venger, Konte yoki Mourino, Gvardiola, Pochettino, umuman mutaxassislar o'rtasidagi aytishuvlar, raqobatlar bilan ham qiziqdir. Shuning uchun qobiqdan chiqib ketishimiz kerak. Ovoz berishda cheklovlar yo'q. Har kim o'zi istagan 3 ta variantni belgilasin va yuboraversin. Shunisi yaxshi.

Muxlislar ovoziga kelsak, qaysi klublarning muxlislari faol bo'lsa, ularda imkoniyat ko'proq bo'lishi normal holat. Ishlasin “Paxtakor” fan klubi, “Bunyodkor” fan klubi va hokazo. Yani, o'zining futbolchisini, murabbiyini ovoz berishda yolg'izlatib qo'ymasin.

Va albatta bir jihatni unutmaylik, hamma narsani faqat muxlislar hal qilayotgani yo'q. Aytaylik, muxlislar Ilhom Mo'minjonovga ovoz berdi, murabbiy ham o'z nomzodini ko'rsatdi (bu manmanlik emas, o'ziga ishonch). Biroq so'rovnomada Mo'minjonov baribir g'olib chiqa olmadi. Chunki mutaxassislar, futbolchilar millionlar o'yiniga umuman boshqacha ko'z bilan qaraydi.

PFLni oldinda ko'p o'zgarishlar, yangiliklar kutib turibdi. Futbolchilar shartnomasi, legionerlar masalasi va boshqa turli yo'nalishlarda katta o'zgarishlar arafasidamiz. Bunday keskin o'zgarishlarga o'rganmagan, hazm qilolmayotgan, harhasha qilayotgan, qo'shilmayotgan klublar vakillari, murabbiylar, hatto hamkasblarimiz ham uchrab turibdi. Biroq sovuqqonlik bilan yangiliklar qilishga harakat qilamizki, chempionatda ijobiy o'zgarishlar bo'lsin. Zero ayrim kishilar 10-15 yilda hech narsa qila olmagani etmaganidek, endi o'sha eski principlaridan voz kecha olmayapti.

Bizning yo'limiz eng to'g'risi demoqchi emasman. Biroq futbolda nimadir o'zgartirish kerakligini hammamiz bilamiz. Va o'sha narsalar o'zgaryapti. Bu kelajak uchun qanday xizmat qilishini albatta vaqt ko'rsatadi (nasib bo'lsa).

Qobiqlardan chiqib ketish kerak. Endi hammasi boshqacha bo'ladi