Davralar oralig'idagi tanaffusdan unumli foydalanib, ikkinchi davraga qizg'in tayyorgarlik ko'rayotgan "Qo'qon-1912" jamoasi bugun Toshkent shahrida nazorat uchrashuvini o'tkazdi.

"Shunqorlar"ning raqibi Termizning "Surxon" jamoasi bo'ldi. Baxtiyor Ashurmatov o'rtoqlik o'yinida tarkibda bo'lib turgan barcha futbolchilarga o'ynash imkonini berdi. Jarohat sababli Murod Xolmuhammedov hamda yaqinda o'z vatanidan qaytib kelgan Slavko Lukichlar bugungi o'yinda qaydnomaga kiritilmadi.

Uchrashuv vodiyliklarning hujumlari bilan boshlandi. O'yinning dastlabki daqiqalarida Xamiddilo Abduxamidov hamda Shohnazar Norbekovlarda qulay imkoniyatlar yuzaga keldi, ular vaziyatlardan foydalana olishmadi. O'yinning 35-daqiqasiga kelib raqib himoyachilari Xamidillo Abduxamidovni to'xtatib qolishni uddasidan chiqa olishmadi. Xamiddillo darvozabon bilan deryali birga-bir vaziyatga chiqib, uchrashuvdagi hisobni ochdi.

Ikkinchi bo'limda jamoa tarkibida bir nechta o'zgarishlar bo'ldi. 53-daqiqada chap qanotdan raqib jarima maydonchasiga yorib kirgan Suhrob Berdiev ikki nafar raqibni aldab o'tdi va darvoza tomon aniq zarba yo'llab hisobni o'zgartirdi. Ikkinchi goldan so'ng termizlik futbolchilar hisobni qisqartirish uchun oldinga intilishdi. Qarshi hujumda Anvar Hojimirzaev himoyachilardan qochib ketdi va "Surxon" darvozasiga uchinchi golni kiritdi.

Uchrashuvning qolgan qismida har ikki jamoa futbolchilari harchand urinishmasin, darvozalarga boshqa gol kiritilmadi. Shunday qilib "shunqorlar" Qurbon hayiti bayramini nishonlash uchun yuqori kayfiyatda uylariga jo'nab ketishdi. Jamoa navbatdagi mashg'ulotlarni 22 iyul kunidan yana Toshkent shahrida davom ettiradi.

O'rtoqlik uchrashuvi

"Qo'qon-1912" - "Surxon" 3:0

Gollar: Xamidillo Abduxamidov (35), Suhrob Berdiev (53), Anvar Xojimirzaev (66).

"Qo'qon-1912" va "Surxon" o'zaro o'rtoqlik uchrashuvi o'tkazdi