Shu kuni bu erda qo'qonlik futbol fidoiysi, ajoyib inson Mahmudjon Umarov xotirasiga bag'ishlangan faxriy futbolchilar o'rtasida futbol turniri o'tkazildi. Turnirda Qo'qon shahrining Qo'qon-1912, Jilet-market, Spartak-Burevestnik, Burevestnik-Qo'qon jamoalari ishtirok etishdi.

Ertalab bo'lib o'tgan o'yinlardan keyin musobaqaning uchinchi o'rini uchun Spartak-Burevestnik va Burevestnik-Qo'qon jamoalari , finalda esa Qo'qon-1912 hamda Jilet-market jamoalari o'ynashlari malum bo'ldi. Tushdan keyin dastlab maydonga uchinchi o'rin uchun kurashadigan jamoalar chiqishdi. Qiziqarli o'tgan uchrashuv 3-3 hisobidagi durang bilan yakuniga etdi. O'yindani keyingi penaltilar seriyasida Spartak-Burevestnik jamoasiga omad kulib boqdi. Shuni alohida aytish lozimki Spartak-Burevestnik jamoasi darvozaboni 59 yoshli Murodjon aka G'ofurov ikki bor penaltini qaytarishga muvaffaq bo'ldilar. Shundan so'ng maydonga finalchilar, Qo'qon-1912 hamda Jilet-market jamoalari chiqib kelishdi. Uchrashuvni respublika toifasidagi hakam R.Tolibjonov adolatli tarzda boshqarib bordi. Final o'yini jangovor kurashlarga boy, murosasiz bo'lib o'tdi. Shu kuni Qo'qonlik futbol muxlislari bir paytlar oliy ligada o'ynagan M.Abduvaliev, M.Mansurov, A.Ashirmatov, J.Tojiboev, I.Mamadiev, A.Otajonov, V.Oxunov, O'.Po'latov, B.Azimov, U.Quvvatov kabi sevimli futbolchilarini yana yashil maydonda ko'rishga muyassar bo'ldilar. O'tgan yili faxriy futbolchilar o'rtasida respublika chempioni bo'lgan Qo'qon-1912 jamoasi faxriy futbolchilari final o'yinida 4-2 hisobida g'olib chiqishdi.

Final o'yini tugaganidan so'ng ishtirokchilarni taqdirlash marosimi o'tkazildi. Bu marosimda Mahmudjon Umarovning yaqin do'stlari, oila azolari va Qo'qon-1912 jamoasining rahbarlari ishtirok etishdi. Har bir ishtirokchi jamoa azolari homiylar tomonidan turli qimmatbaho sovg'alar bilan taqdirlandilar. G'olib jamoaga esa kubok, diplom va televizor sovg'a qilindi. Musobaqa ishtirokchilari turli nominaciyalar bo'yicha ham taqdirlandilar. Eng yaxshi darvozabon, himoyachi, yarim himoyachi, hujumchi, eng yoshi ulug' futbolchi va eng yosh futbolchi nominaciyalari bo'yicha futbolchilar esdalik sovg'alari, gilam, uyali telefon va pul mukofotlari bilan taqdirlandilar. Taqdirlangan futbolchilar orasida 62yoshli Mahmudjon Abdullaevning hali ham yashil maydonda harakat qilganlari barchaning olqishlariga sabab bo'ldi. Shu kuni o'yingohga kelgan barcha muxlisu futbolchilar yaxshi kayfiyatda qaytib ketdilar.

Akramjon Mamadaliev

Qo'qonda faxriylar o'rtasida turnir o'tkazildi