Avval xabar berganimizdek birinchi navbatda stadion yoritgichlarini yangilash uchun xorijiy kompaniyaga 100 foiz to'lovlar amalga oshirilgan bo'lib, endi ularni Qo'qonga etib kelishi hamda “markaziy” stadion machtalariga o'rnatish ishlari qolgan. Kecha Chexiya davlatidan yoritgichlarning navbatdagi qismlari Qo'qonga etib keldi. Bu safar yoritgichlarning lampa, drossel hamda boshqa ehtiyot qismlari kelgan. Endi biz navbatdagi partiyani kutamiz va bu borada hamkorlar bilan aloqada bo'lib turibmiz.

Stadionimiz chimini futbol o'ynash uchun ideal holatga keltirish jamoa rahbariyatining navbatdagi rejasi bo'lib, bu borada ham amaliy ishlar boshlanib ketdi. “Markaziy” stadioniga O'zPFL bilan hamkorlikda yurtimizdagi ko'plab stadionlarni, jumladan Qarshidagi “markaziy”, Buxorodagi “Buxoro”, Toshkentdagi “Bunyodkor”, Farg'onadagi “Istiqlol” kabi stadionlarning maydonlarini ajoyib ko'rinishga kelishiga sababchi bo'lgan mutaxassis Uchqunbek Quvonov boshchiligidagi maydon ustalarining vakili bo'lgan mutaxassis Begzodjon Hamdamov Qo'qonga kelgan edi. Mutaxassis “markaziy” stadion chimini ko'zdan kechirib, amalga oshirish lozim bo'lgan ishlarni belgilab berdi. Maydon chimining holatini ko'zdan kechirgan mutaxassis chimning holatiga yaxshi baho berdi. Bundan bu yog'iga maydon chimini reja asosida parvarishlash va mineral o'g'itlar bilan agrotexnika ishlarini amalga oshirish lozimligi belgilab olindi. Maydon chimini parvarishlash uchun zarur bo'lgan texnikalarni xarid qilish, chimga biokimyoviy o'g'itlar bilan ishlov berish masalalari ham muhokama qilinib, mutaxassislar tomonida tegishli ko'rsatmalar berildi.

Ayni kunlarda “markaziy” stadion chimini yaxshilash borasida ishlar boshlanib ketgan.

Qo'qondagi “markaziy” stadionida katta hajmdagi ishlar amalga oshiriladi